திரைப்படங்கள் வெளியான பிறகு பல்வேறு சர்ச்சைகள், எதிர்ப்புகள் அல்லது சட்டப் போராட்டங்கள் காரணமாகத் திரையரங்குகளில் இருந்தோ அல்லது ஓடிடி தளங்களில் இருந்தோ தற்காலிகமாகவோ அல்லது முழுமையாகவோ நீக்கப்பட்ட தென்னிந்தியத் திரைப்படங்கள் பற்றிய விவரங்கள் வெளியாகியுள்ளன.
கமல்ஹாசனின் இயக்கத்திலும் நடிப்பிலும் வெளியான 'விஸ்வரூபம்' திரைப்படம், அதில் ஒரு குறிப்பிட்ட சமூகத்தினரைத் தவறாகச் சித்தரித்துள்ளதாகக் கூறி சில அமைப்புகளின் பலத்த எதிர்ப்பைச் சந்தித்தது. இதனால் தமிழக அரசு இத்திரைப்படத்திற்கு 15 நாட்கள் தடை விதித்ததால் திட்டமிட்டபடி திரையிட முடியாமல் போனது. பின்னர் பேச்சுவார்த்தைகள் மற்றும் சில காட்சிகள் நீக்கப்பட்ட பிறகே இப்படம் வெளியானது. இதேபோல் மலேசியா, சிங்கப்பூர், இலங்கை போன்ற நாடுகளிலும் இதன் வெளியீடு தள்ளிப்போனது.
அடுத்ததாக, நயன்தாரா நடிப்பில் ஓடிடி தளத்தில் வெளியான 'அன்னபூரணி' திரைப்படம் கடுமையான விமர்சனங்களைச் சந்தித்தது. சைவக் குடும்பத்தைச் சேர்ந்த பெண் ஒருவர் அசைவம் சமைப்பது போன்ற காட்சிகள், இராமபிரான் குறித்த சில குறிப்பிட்ட வசனங்கள் மற்றும் தொழுகை நடத்தும் காட்சிகள் ஆகியவை தங்களின் மத உணர்வுகளைப் புண்படுத்துவதாகப் பல அமைப்புகள் காவல்நிலையங்களில் புகார்களை அளித்தன. இதனைத் தொடர்ந்து படக்குழுவினர் மன்னிப்புக் கோரியதுடன், இத்திரைப்படம் நெட்ஃபிளிக்ஸ் தளத்தில் இருந்தும் நீக்கப்பட்டது.
இதேபோல் துல்கர் சல்மான் நடிப்பில் வெளியாகிப் பெரும் வரவேற்பைப் பெற்ற 'சீதா ராமம்' திரைப்படம், அதன் புவியியல் மற்றும் மதரீதியான பின்னணி காரணமாகச் சவூதி அரேபியா, குவைத், ஐக்கிய அரபு அமீரகம் போன்ற சில வளைகுடா நாடுகளில் தடை செய்யப்பட்டது. மேலும், லுக்மேன் அவரன் மற்றும் சன்னி வெய்ன் நடிப்பில் வெளியான 'டர்கிஷ் தர்க்கம்' என்ற மலையாளத் திரைப்படம், ஒரு குறிப்பிட்ட சமூகத்தின் உணர்வுகளைப் புண்படுத்துவதாக எழுந்த புகார்களைத் தொடர்ந்து, சர்ச்சைகளைத் தவிர்ப்பதற்காகப் படக்குழுவினரால் திரையரங்குகளில் இருந்து தற்காலிகமாகத் திரும்பப் பெறப்பட்டது. இறுதியாக, ராகவேந்திர ராவ் இயக்கத்தில் உருவான 'இன்டிண்டி அன்னமய்யா' என்ற தெலுங்குத் திரைப்படம், தயாரிப்பாளருக்கும் இயக்குநருக்கும் இடையே ஏற்பட்ட கருத்து வேறுபாடுகள் மற்றும் சட்டச் சிக்கல்கள் காரணமாக, விளம்பரப் பணிகள் முடிந்த நிலையிலும் இன்றுவரை திரைக்கு வராமலேயே முடக்கப்பட்டுள்ளது.
