சென்னை, மார்ச் 16, 2026: கவிஞர் வைரமுத்துவுக்கு நாட்டின் உயரிய இலக்கிய விருதான ஞானபீட விருது அறிவிக்கப்பட்டதைத் தொடர்ந்து, அவருக்கு வாழ்த்து தெரிவித்த திரையுலக ஜாம்பவான்கள் கமல்ஹாசன் மற்றும் ரஜினிகாந்த்தைச் சாடி பாடகி சின்மயி வெளியிட்ட பதிவுகள் தற்போது பெரும் சர்ச்சையை ஏற்படுத்தியுள்ளன. தமிழ் இலக்கிய உலகிற்கு வைரமுத்து ஆற்றிய பங்களிப்பிற்காக இந்த விருது வழங்கப்பட்டுள்ள நிலையில், ரஜினிகாந்த் மற்றும் கமல்ஹாசன் தங்களது சமூக வலைதளப் பக்கங்களில் அவருக்குப் பாராட்டுத் தெரிவித்திருந்தனர்.
இதனைக் கண்டு அதிருப்தி அடைந்த பாடகி சின்மயி, கடந்த 2018-ஆம் ஆண்டு வைரமுத்து மீது சுமத்தப்பட்ட பாலியல் புகார்களைச் சுட்டிக்காட்டி இரு நடிகர்களையும் கடுமையாக விமர்சித்தார். பாதிக்கப்பட்ட பெண்களுக்கு ஆதரவாக நிற்க வேண்டிய திரைத்துறைத் தலைவர்கள், குற்றம் சாட்டப்பட்ட ஒருவருக்குத் தொடர்ந்து முக்கியத்துவம் அளித்து வருவது ஏமாற்றம் அளிப்பதாக அவர் பதிவிட்டிருந்தார். மேலும், தானும் ஒரு காலத்தில் இவர்களின் தீவிர ரசிகையாக இருந்ததாகவும், ஆனால் தற்போது இவர்களின் நிலைப்பாட்டைக் கண்டு அதிர்ச்சியடைந்துள்ளதாகவும் அவர் தெரிவித்தார்.
சின்மயின் இந்தப் பதிவிற்கு எதிராக கமல் மற்றும் ரஜினி ரசிகர்கள் தற்போது சமூக வலைதளங்களில் கடும் கண்டனங்களைப் பதிவு செய்து வருகின்றனர். ஒருவருடைய இலக்கிய சாதனையைப் பாராட்டுவதில் என்ன தவறு இருக்கிறது என்றும், தனிப்பட்ட புகார்களைத் தொழில்முறைச் சாதனைகளுடன் ஒப்பிடக் கூடாது என்றும் ரசிகர்கள் வாதிட்டு வருகின்றனர். இதனால் சின்மயிக்கும் ரசிகர்களுக்கும் இடையே இணையத்தில் காரசாரமான விவாதங்கள் நடைபெற்று வருகின்றன. எத்தகைய விமர்சனங்கள் எழுந்தாலும், உண்மையை உரக்கச் சொல்வதில் தான் தயங்கப் போவதில்லை என்று சின்மயி மீண்டும் ஒரு பதிவின் மூலம் தெளிவுபடுத்தியுள்ளார்.
