தேசிய விருது வென்ற நடிகர் சூர்யாவின் நடிப்பில், ‘ஆவேசம்’ திரைப்பட புகழ் இயக்குநர் ஜித்து மாதவன் இயக்கத்தில் பெரும் எதிர்பார்ப்பை ஏற்படுத்தியுள்ள ‘சூர்யா 47’ திரைப்படத்தின் ஒட்டுமொத்த படப்பிடிப்பும் வெற்றிகரமாக நிறைவடைந்துள்ளது. முதன்முறையாக சூர்யா மற்றும் ஜித்து மாதவன் கூட்டணியில் உருவாகும் இத்திரைப்படத்தில் நஸ்ரியா பஹத் கதாநாயகியாக நடிக்க, இளம் நடிகர் நஸ்லென் முக்கிய கதாபாத்திரத்தில் நடித்துள்ளார். தற்பொழுது படப்பிடிப்பு முழுமையாக நிறைவடைந்துள்ளதை தயாரிப்பு நிறுவனம் அதிகாரப்பூர்வமாக அறிவித்துள்ளதோடு, படம் விரைவாக தயாரிப்புக்கு பிந்தைய பணிகளுக்கு நகர்ந்துள்ளது.
அதிவேகமாகப் பணிகள் நடைபெற்று வரும் நிலையில், நடிகர் சூர்யாவின் 51-ஆவது பிறந்தநாளான வரும் ஜூலை 23, 2026 அன்று இத்திரைப்படத்தின் அதிகாரப்பூர்வ தலைப்பு மற்றும் அதிரடியான ஃபர்ஸ்ட் லுக் போஸ்டர் ஆகியவை வெளியிடப்படவுள்ளதாகப் படக்குழுவினர் அறிவித்துள்ளனர். ஆக்ஷன், காமெடி மற்றும் எமோஷனல் டிராமா கலந்த திரைப்படமாக இது உருவாகியுள்ளதால் ரசிகர்கள் மத்தியில் பெரும் எதிர்பார்ப்பு நிலவுகிறது. இது தவிர, வெங்கட் அட்லூரி இயக்கத்தில் சூர்யா நடித்துள்ள ‘விஸ்வநாதன் அண்ட் சன்ஸ்’ திரைப்படம் வரும் ஆகஸ்ட் 14 அன்று திரையரங்குகளில் வெளியாகத் தயாராகி வருவது குறிப்பிடத்தக்கது.
