மலேசியாவின் நம்பர் ஒன் கலப்பு இரட்டையர் ஜோடியான சென் டாங் ஜியே - தோ ஈ வெய், ஆசிய பேட்மிண்டன் சாம்பியன்ஷிப் போட்டியின் காலிறுதிக்கு முந்தைய சுற்றில் இந்தியாவின் துருவ் கபிலா - தனிஷா கிராஸ்டோ ஜோடியைத் தோற்கடித்து அசத்தலாகக் காலிறுதிக்குள் நுழைந்துள்ளனர்.
தற்போது உலகத் தரவரிசையில் நான்காவது இடத்தில் இருக்கும் மலேசிய ஜோடி, ஆட்டத்தின் தொடக்கம் முதலே தங்களின் ஆதிக்கத்தைச் செலுத்தினர். வெறும் 37 நிமிடங்களில் 21-13, 21-14 என்ற நேர் செட்களில் இந்திய ஜோடியை வீழ்த்தி வெற்றி பெற்றனர். நாளை நடைபெறவுள்ள காலிறுதி ஆட்டத்தில் இவர்கள் தென் கொரியாவின் கிம் ஜே ஹியோன் - ஜாங் ஹா ஜியோங் ஜோடியை எதிர்கொள்ளவுள்ளனர்.
அதே வேளையில், மலேசியாவின் மற்ற இரண்டு கலப்பு இரட்டையர் ஜோடிகளான கோ சூன் ஹுவாட் - ஷெவோன் லாய் மற்றும் வோங் தியென் சி - லிம் சியூ சியன் ஆகியோர் இரண்டாவது சுற்றில் தோல்வியடைந்து போட்டியிலிருந்து வெளியேறினர்.
மேலும், மகளிர் ஒற்றையர் பிரிவில் பங்கேற்ற மலேசிய வீராங்கனை கே. லெத்சனா, தென் கொரியாவின் சிம் யூ ஜின்னிடம் 14-21, 8-21 என்ற கணக்கில் தோல்வியடைந்தார். இருப்பினும், சென் டாங் ஜியே - தோ ஈ வெய் ஜோடியின் இந்த வெற்றி மலேசியாவிற்குப் பதக்கம் வெல்லும் நம்பிக்கையை அளித்துள்ளது.
