சரவாக் மாநிலச் சட்டமன்றம் இவ்வாரமே கலைக்கப்பட்டு, 13ஆவது மாநிலத் தேர்தலுக்கு வழிவகுக்கப்படலாம் என்ற ஊகங்கள் வலுத்துள்ளன.
மாநில முதலமைச்சர் டான் ஶ்ரீ அபாங் ஜோஹாரி ஓப்பேங், வரும் வெள்ளிக்கிழமை முக்கிய அறிவிப்பை வெளியிடுவார் என்ற தகவலைத் தொடர்ந்து இந்த எதிர்பார்ப்பு எழுந்துள்ளது. இன்றுடன் மாநிலச் சட்டமன்றக் கூட்டத் தொடர் நிறைவடைவதால், இன்றே கலைப்பு அறிவிப்பு வெளியாகலாம் என்றும் ஊகிக்கப்படுகிறது.
சட்டமன்றம் முன்கூட்டியே கலைக்கப்படாவிட்டால், வரும் டிசம்பரில் தானாகவே கலைக்கப்படும். அதன் பின்னர் 60 நாள்களுக்குள் தேர்தல் நடத்தப்பட வேண்டும்.
கடந்த 2021ஆம் ஆண்டு நடைபெற்ற தேர்தலில், ஜிபிஎஸ் எனப்படும் காபுங்கான் பார்ட்டி சரவாக் கூட்டணி 82 இடங்களில் 76 இடங்களைக் கைப்பற்றியது. இந்நிலையில், அடுத்த மாநிலத் தேர்தல் டிசம்பர் 12 முதல் 19ஆம் தேதிக்குள் நடைபெறலாம் என மாநில அமைச்சர் அப்துல் காரிம் ரஹ்மான் ஹம்ஸா ஏற்கெனவே தெரிவித்திருந்தார்.
