நெகிரி செம்பிலான் மாநில அரசின் 10 ஆட்சிக்குழு உறுப்பினர்கள், தங்களது நியமனங்களை ரத்து செய்த யாங் டி-பெர்துவான் பெசாரின் முடிவை எதிர்த்து கூட்டரசு நீதிமன்றத்தில் மனு தாக்கல் செய்துள்ளனர்.
கடந்த அக்டோபர் 14-ஆம் தேதி தாக்கல் செய்யப்பட்ட இந்த மனுவில், நெகிரி செம்பிலான் மாநில அரசியலமைப்பின் தொடர்புடைய சட்டப்பிரிவுகளை விளக்கி முடிவெடுக்குமாறு அவர்கள் கோரியுள்ளனர். இது தொடர்பாக அக்டோபர் 5-ஆம் தேதி சிரம்பான் உயர் நீதிமன்றத்திலும் வழக்குத் தொடுத்திருந்தனர்.
மந்திரி பெசாரின் ஆலோசனையின்றி ஆட்சிக்குழு உறுப்பினர்களின் நியமனத்தை யாங் டி-பெர்துவான் பெசார் ரத்து செய்ய முடியுமா என்பதும், கடந்த செப்டம்பர் 24-ஆம் தேதி வெளியிடப்பட்ட நியமன ரத்து அறிவிப்பு சட்டப்படி செல்லுபடியாகுமா என்பதும் நீதிமன்றத்தின் முன் வைக்கப்பட்டுள்ள முக்கியக் கேள்விகளாகும்.
