மலாக்கா மாநிலத் தேர்தலில் பக்காத்தான் ஹராப்பானின் முதலமைச்சர் வேட்பாளராக யாரை முன்னிறுத்துவது என்பது குறித்து இன்னும் முடிவெடுக்கவில்லை என்று தொடர்புத்துறை அமைச்சர் டத்தோ ஸ்ரீ ஃபாஹ்மி ஃபாட்சீல் தெரிவித்துள்ளார்.
முன்னாள் மலாக்கா முதலமைச்சர் அட்லி ஸாஹாரியை அந்தப் பொறுப்புக்குப் பரிந்துரைப்பது குறித்து, பக்காத்தான் ஹராப்பான் கூட்டணியின் தலைவர் மன்றம் இன்னும் விவாதிக்கவில்லை என்றும், இது தொடர்பாகத் தலைவர் மன்றமே முடிவெடுக்கும் என்றும் அவர் கூறினார். இருப்பினும், மலாக்கா மாநிலத்தில் முதலமைச்சராக அட்லி சேவையாற்றிய அனுபவம் இருப்பதை ஃபாஹ்மி ஒப்புக் கொண்டார்.
அட்லி ஸாஹாரியை முதலமைச்சர் வேட்பாளராக முன்னிறுத்த வேண்டும் என்று கடந்த அக்டோபர் 12ஆம் தேதி, அமானா கட்சியின் கூட்டரசுப் பிரதேசத் துணைத் தலைவர் ஹாயாதுல் காமில் வலியுறுத்தியிருப்பது தொடர்பில் கருத்துரைக்கையில் ஃபாஹ்மி இதனைத் தெரிவித்தார்.
இதனிடையே மலாக்கா தேர்தலில் பெர்சாத்து கட்சியுடனான ஒத்துழைப்பு குறித்து எழுப்பப்பட்ட கேள்விக்கு, அதனை பக்காத்தான் ஹராப்பான் தேர்தல் இயக்குநர் டத்தோ ஶ்ரீ அமிருடின் ஷாரியிடம் கேட்குமாறு ஃபாஹ்மி தெரிவித்துள்ளார்.
மலாக்கா மாநிலத் தேர்தல் வரும் நவம்பர் 14ஆம் தேதி நடைபெறவுள்ளது.
