பெண்களுக்கு போதைப்பொருள் கொடுத்து பாலியல் வன்கொடுமை செய்து வந்த சர்வதேச நெட்வொர்க் தொடர்பாக, பிரிட்டனின் தேசிய குற்றவியல் முகமை 8 பேரைக் கைது செய்துள்ளது. தங்களுக்குத் தெரிந்த பெண்களுக்கே போதைப்பொருள் கொடுத்து இந்த கொடூரச் செயலில் ஈடுபட்டு வந்த ஆண்களின் உலகளாவிய நெட்வொர்க் குறித்து நடத்தப்பட்ட விசாரணையின் ஒரு பகுதியாக இந்த நடவடிக்கை எடுக்கப்பட்டுள்ளது.
இந்த விவகாரம் பிரான்சைச் சேர்ந்த ஜிசெல் பெலிகாட் வழக்கினை நினைவூட்டும் வகையில் அமைந்துள்ளது. கடந்த 2025ஆம் ஆண்டு ஜெர்மனி பத்திரிகையாளர்கள் அளித்த தகவலின் பேரில், இணையதளம் மூலமாக இந்த குற்றங்கள் திட்டமிட்டு அரங்கேற்றப்படுவது கண்டுபிடிக்கப்பட்டது. ஒவ்வொரு கண்டத்திலும் உள்ள டஜன் கணக்கான நாடுகளில் இந்த குழுவின் உறுப்பினர்கள் செயல்பட்டு வருவது விசாரணையில் தெரியவந்துள்ளது.
டிஜிட்டல் தளங்கள் மூலம் இத்தகைய குற்றங்கள் பெருகி வருவது மிகவும் கவலைக்குரிய விஷயம் என்று அதிகாரிகள் தெரிவித்துள்ளனர். பாதிக்கப்பட்ட பெண்களுக்குப் போதைப்பொருள் கொடுக்கப்படுவதால் தங்களுக்கு நேர்ந்த கொடுமைகள் அவர்களுக்கு நினைவிருக்காது என்றும், இதனால் பல வழக்குகள் வெளியில் தெரிவதில்லை என்றும் கூறப்பட்டுள்ளது. பிரிட்டன் மற்றும் வெளிநாடுகளில் இது தொடர்பாக மொத்தம் 14 தனித்தனி விசாரணைகள் நடந்து வருகின்றன. மேலும், கடந்த வாரம் பிரேசில், கனடா, பிரான்ஸ், ஹங்கேரி, நெதர்லாந்து, ஸ்பெயின், அமெரிக்கா மற்றும் யூரோபோல் ஆகிய நாடுகளின் புலனாய்வாளர்கள் லண்டனில் கூடி இது தொடர்பான தகவல்களைப் பகிர்ந்து கொண்டது குறிப்பிடத்தக்கது.
