வாஷிங்டன், மார்ச் 13:
மலேசியா உள்ளிட்ட உலகின் முக்கிய வர்த்தகப் பங்காள நாடுகளுக்கு எதிராக, 'நியாயமற்ற வர்த்தக நடைமுறைகள்' மற்றும் 'கட்டாய உழைப்பு'ஆகிய புகார்களின் கீழ் அமெரிக்கா இரண்டு வெவ்வேறு பிரம்மாண்ட விசாரணைகளைத் தொடங்கியுள்ளது. அமெரிக்க வர்த்தகப் பிரதிநிதி ஜேமிசன் கிரீர் வெளியிட்டுள்ள அறிவிப்பின்படி, 1974-ஆம் ஆண்டின் வர்த்தகச் சட்டத்தின் பிரிவு 301-இன் கீழ் இந்த விசாரணைகள் மேற்கொள்ளப்படுகின்றன. அமெரிக்க உச்ச நீதிமன்றம் சமீபத்தில் அதிபர் டொனால்ட் டிரம்ப் நிர்வாகத்தின் சில வர்த்தக வரித் திட்டங்களை ரத்து செய்ததைத் தொடர்ந்து, மீண்டும் வர்த்தக ரீதியான அழுத்தங்களைக் கொடுக்க அமெரிக்கா இந்தச் சட்டப்பூர்வமான விசாரணையை ஒரு கருவியாகப் பயன்படுத்தத் தொடங்கியுள்ளது.
முதல் விசாரணையானது மலேசியா உட்பட 16 நாடுகளை இலக்கு வைத்துள்ளது. இதில் சீனா, ஐரோப்பிய ஒன்றியம், சிங்கப்பூர், இந்தியா மற்றும் ஜப்பான் போன்ற நாடுகளும் அடங்கும். இந்த நாடுகள் தங்களின் உள்நாட்டுத் தேவையை விட அதிகமாகப் பொருட்களை உற்பத்தி செய்து, அவற்றைச் சர்வதேசச் சந்தையில் மிகக் குறைந்த விலைக்கு விற்பனை செய்வதாக அமெரிக்கா குற்றம் சாட்டியுள்ளது. குறிப்பாக, மலேசியாவிலிருந்து ஏற்றுமதி செய்யப்படும் மின்னணு சாதனங்கள், இயந்திரங்கள் மற்றும் எஃகு போன்ற துறைகளில் நிலவும் உற்பத்தித் திறன் அதிகரிப்பு, அமெரிக்காவின் உள்நாட்டுத் தொழில் நிறுவனங்களைப் பாதிப்பதாக வாஷிங்டன் கவலை தெரிவித்துள்ளது. மலேசியா அமெரிக்காவுடன் கொண்டுள்ள பெரிய அளவிலான வர்த்தக உபரி குறித்தும் இந்த விசாரணையில் முக்கிய கவனம் செலுத்தப்படவுள்ளது.
இரண்டாவது விசாரணை மிகவும் விரிவானது மற்றும் இது மலேசியா உள்ளிட்ட 60 நாடுகளை உள்ளடக்கியுள்ளது. சர்வதேச அளவில் 'கட்டாய உழைப்பை' ஒழிக்க உடன்பாடு ஏற்பட்டிருந்தாலும், பல நாடுகள் இதனைத் தடுக்கத் தவறிவிட்டதாக அமெரிக்கா சாடியுள்ளது. கட்டாய உழைப்பின் மூலம் உற்பத்தி செய்யப்படும் பொருட்கள் அமெரிக்கச் சந்தைக்குள் நுழைவதைத் தடுக்க அந்தந்த நாட்டு அரசாங்கங்கள் போதிய நடவடிக்கை எடுக்கவில்லை என்பது இந்த விசாரணையின் முக்கிய அம்சமாகும். இதன் மூலம் அமெரிக்கத் தொழிலாளர்கள் முறையற்ற போட்டியைச் சந்திக்க நேரிடுவதாக அமைச்சர் ஜேமிசன் கிரீர் சுட்டிக்காட்டியுள்ளார்.
இந்த விசாரணைகள் தொடர்பாகச் சம்பந்தப்பட்ட நாடுகளுடன் ஆலோசனைகளை நடத்த அமெரிக்கா திட்டமிட்டுள்ளது. பொதுமக்கள் மற்றும் வணிக அமைப்புகள் தங்களின் கருத்துகளைத் தெரிவிக்க ஏப்ரல் 15 வரை கால அவகாசம் வழங்கப்பட்டுள்ளது. இதனைத் தொடர்ந்து மே 5-ஆம் தேதி வாஷிங்டனில் பொது விசாரணை நடைபெறும். இந்த விசாரணைகளின் முடிவில், மலேசியாவின் வர்த்தக நடைமுறைகள் அமெரிக்காவிற்குப் பாதிப்பை ஏற்படுத்துவது உறுதி செய்யப்பட்டால், ஜூலை மாத இறுதிக்குள் மலேசியப் பொருட்கள் மீது கடுமையான இறக்குமதி வரிகள் அல்லது இதர வர்த்தகக் கட்டுப்பாடுகள் விதிக்கப்பட வாய்ப்புள்ளது.
