சிலாங்கூர் மாநிலத்தில், லங்காட் ஆற்றின் கரையில் அமைதியாக வீற்றிருக்கிறது ஜுக்ரா மலை. இது வெறும் இயற்கை எழில் கொஞ்சும் மலை மட்டுமல்ல; சிலாங்கூர் சுல்தானகத்தின் பழையத் தலைநகராகவும், மாலுமிகளின் வழிகாட்டியாகவும், மர்மக் கதைகளின் உறைவிடமாகவும் திகழ்கிறது.
மலாக்கா நீரிணையில் பயணம் செய்யும் கப்பல்களுக்கு ஜுக்ரா மலை ஒரு முக்கியமான அடையாளப் புள்ளியாகும். இங்குள்ள இரண்டு கலங்கரை விளக்கங்கள் காலத்தின் சாட்சிகளாக நிற்கின்றன. பிரிட்டிஷ் ஆட்சிக் காலத்தில் 146 மீட்டர் உயரமுள்ள மலையின் உச்சியில் இது கட்டப்பட்டது. மலாக்கா நீரிணையில் இரவு நேரங்களில் பயணிக்கும் கப்பல்களுக்கு இது ஒரு நம்பிக்கையின் ஒளியாகத் திகழ்ந்தது.
நவீனக் கோபுரம்
பழைய கோபுரத்தின் பணிக்குத் துணையாக, நவீனத் தொழில்நுட்பங்களுடன் 25 மீட்டர் உயரமுள்ள மற்றொரு கலங்கரை விளக்கம் அமைக்கப்பட்டது. இன்றும் இவை சர்வதேச கப்பல் போக்குவரத்துப் பாதையில் முக்கியப் பங்காற்றுகின்றன. ஜுக்ரா ஒரு காலத்தில் ராயல் சிட்டியாக இருந்தது. 1800-களின் இறுதியில் சுல்தான் அப்துல் சமத் இங்குதான் தனது அரண்மனையை அமைத்திருந்தார். மலைக்குச் செல்லும் வழியில் காணப்படும் பழைய அரண்மனை இடிபாடுகள், ஆயுதக் கிடங்கு மற்றும் சுல்தான் அலாவுதீன் மசூதி ஆகியவை ஜுக்ராவின் பொற்காலத்தை நமக்கு நினைவூட்டுகின்றன.
ஜுக்ரா மலையைச் சுற்றிப் பல நூற்றாண்டுகளாகப் பேசப்படும் கதைகள் சுவாரஸ்யமானவை மட்டுமல்ல, சில நேரங்களில் அச்சமூட்டுபவையும் கூட. ஒரு நாட்டுப்புறக் கதையின்படி, மலையில் கலங்கரை விளக்கம் கட்டப்பட்ட போது இயற்கை அன்னை கோபமடைந்ததாகவும், இதனால் மலையிலிருந்து குருதி வழிந்தோடி அருகில் இருந்த ஆறு சிவப்பு நிறமாக மாறியதாகவும் நம்பப்படுகிறது.
ஜுக்ராவின் அடர்ந்த காடுகளில் இன்றும் 'பேய் புலிகள்' நடமாடுவதாக உள்ளூர் மக்கள் நம்புகின்றனர். இவை இப்பகுதியில் உள்ள புனித இடங்களையும் ராயல் கல்லறைகளையும் பாதுகாப்பதாகக் கூறப்படுகிறது. புகழ் பெற்ற இளவரசி புத்ரி குனுங் லேடாங் தொடர்பான கதைகளும் ஜுக்ராவோடு பிணைக்கப்பட்டுள்ளன. அவர் தனது கணவரைக் கொன்று விட்டு இங்குதான் மறைந்திருந்ததாக ஒரு கிளைக் கதை நிலவுகிறது.
இன்று ஜுக்ரா ஒரு வரலாற்றுச் சின்னம் என்பதைத் தாண்டி, சாகச விரும்பிகளின் புகலிடமாக மாறியுள்ளது. இங்கிருந்து குதித்துச் செய்யப்படும் பாராகிளைடிங் மிகவும் பிரபலம். மலையின் உச்சியிலிருந்து லங்காட் ஆறு கடலில் கலக்கும் அழகிய காட்சியைப் பார்ப்பது ஒரு தனி அனுபவம்.
ஜுக்ரா மலை என்பது வெறும் மண் குவியல் அல்ல; அது சிலாங்கூரின் ஆன்மா. கலங்கரை விளக்கின் ஒளியும், பழங்காலக் கதைகளின் மர்மமும், வரலாற்றின் பெருமையும் ஜுக்ராவை மலேசியாவின் தவிர்க்க முடியாத ஒரு பொக்கிஷமாக மாற்றியுள்ளன.
