ஈப்போ, பிப்ரவரி.18-
65 நாடுகளின் கொடிகளை 1 நிமிடம் 14 வினாடிகளில் அடையாளம் கண்டு கூறி, மலேசியாவின் பேராக் மாநிலம், கம்பார் பகுதியைச் சேர்ந்த 7 வயது சிறுவன் ஷாவின் குழந்தைகளுக்கான உலகச் சாதனையைப் படைத்து, Kids book of Records என்ற சாதனைப் புத்தகத்திலும் பெயர் பதித்துள்ளார்.
கடந்த டிசம்பர் 30-ஆம் தேதி, கம்பாரில் நடைபெற்ற இந்நிகழ்வில், நினைவாற்றல் மற்றும் பொது அறிவுத் துறையில் ஷாவின் தனது அசாத்திய திறனை வெளிப்படுத்தி ஒரு புதிய மைல்கல்லை எட்டியதால் அவருக்கு இந்த சாதனையானது வழங்கப்பட்டுள்ளது.
குறிப்பிட்ட கால அவகாசத்திற்குள், 65 நாடுகளின் தேசியக் கொடிகளை அடையாளம் கண்டு வாசித்து, பார்வையாளர்களையும் நடுவர்களையும் கவர்ந்த ஷாவின் பலரது பாராட்டுகளைப் பெற்றுள்ளார்.
இந்நிலையில், அச்சிறுவனின் சாதனையை அறிந்து, Prima Kampar Residensi-யிலுள்ள அவரது வீட்டிற்குச் சென்ற மாலிம் நவார் சட்டமன்ற உறுப்பினர் வி. பவானி ஷாஷா, அவருக்கு தமது வாழ்த்துகளையும், பாராட்டுகளையும் தெரிவித்தார்.
ஷாவின் குழந்தையாக இருக்கும் போது, பொழுதுபோக்கிற்காக அவனிடம் வெவ்வேறு நாடுகளின் கொடிகளை காட்டி அடையாளம் காணுமாறு கூறிய அவரது தந்தை வினோத், பின்னர் அவனது அசாத்திய நினைவாற்றலைக் கண்டு, தனது மனைவியிடம் தெரிவித்துள்ளார்.
அதன் பின்னர், அப்பெற்றோர் பல முயற்சிகள் எடுத்து, ஷாவினை உலகச் சாதனை படைக்கும் அளவிற்கு ஊக்குவித்ததாகவும் பவானி ஷாஷா குறிப்பிட்டுள்ளார்.
சிறு வயதிலிருந்தே உலகச் சாதனைகள் படைத்து வரும் ஷாவின் போன்ற குழந்தைகளால், மாலிம் நவார் பகுதியைச் சேர்ந்த மக்கள் மிகவும் மதிக்கப்படுகிறார்கள் என்று தான் நம்புவதாகவும் பவானி ஷாஷா தெரிவித்துள்ளார்.
அதே வேளையில், ஷாவின் மேலும் பல உலக சாதனைகளைப் படைக்க தனது வாழ்த்துகளையும் கூறியுள்ளார்.
