சிங்கப்பூர் ஏர்லைன்ஸ் நிறுவனத்திற்குச் சொந்தமான ஏர்பஸ் A380 விமானம் ஒன்று, கேட்டரிங் டிரக் மோதியதால் கடந்த புதன்கிழமை ஏப்ரல் 22 ஜெர்மனியின் பிராங்க்பர்ட் நகருக்குப் புறப்படுவதில் தாமதத்தைச் சந்தித்தது.
சாங்கி விமான நிலையத்தில் நிறுத்தி வைக்கப்பட்டிருந்த அந்த விமானத்தின் என்ஜின் பகுதியில், உணவு விநியோகம் செய்யும் கேட்டரிங் டிரக் எதிர்பாராதவிதமாக உரசியது. இதன் காரணமாக விமானத்தின் என்ஜின் கவசம் சேதமடைந்தது. இந்த விபத்து நடந்தபோது விமானத்தில் பயணிகள் யாரும் இல்லை என்பதால் உயிர்ச்சேதம் தவிர்க்கப்பட்டது. இருப்பினும், பாதுகாப்பு கருதி விமானத்தை ஆய்வு செய்யவும், பழுதுபார்க்கவும் வேண்டியிருந்ததால், மாற்று விமானம் ஏற்பாடு செய்யப்பட்டது. இதனால் நண்பகல் 12.35-க்குப் புறப்பட வேண்டிய SQ326 விமானம், சுமார் 1.5 மணி நேரம் தாமதமாகப் பிற்பகல் 2.13 மணிக்கு 452 பயணிகள் மற்றும் 28 பணியாளர்களுடன் புறப்பட்டது.
இந்தத் தாமதத்தின் காரணமாக, பிராங்க்பர்ட் விமான நிலையத்தில் நடைமுறையிலுள்ள இரவு நேரக் கட்டுப்பாடு விதிகளால், அங்கிருந்து சிங்கப்பூர் திரும்ப வேண்டிய SQ325 விமானம் ரத்து செய்யப்பட்டது. பாதிக்கப்பட்ட பயணிகளுக்கு உணவும், தங்கும் இடமும் வழங்கிய சிங்கப்பூர் ஏர்லைன்ஸ், இந்த அசௌகரியத்திற்குத் தனது வருத்தத்தைத் தெரிவித்துக் கொண்டது. பழுதுபார்க்கப்பட்ட அந்த விமானம் தற்போது மீண்டும் சேவையில் இணைந்துள்ளதாகத் தெரிவிக்கப்பட்டுள்ளது.
