இஸ்ரேல் மற்றும் லெபனான் இடையேயான போர்நிறுத்தம் மேலும் மூன்று வாரங்களுக்கு நீட்டிக்கப்படுவதாக அமெரிக்க அதிபர் டொனால்ட் ட்ரம்ப் அதிகாரப்பூர்வமாக அறிவித்துள்ளார்.
வெள்ளை மாளிகையின் ஓவல் அலுவலகத்தில் இரு நாடுகளின் தூதர்களுடன் நடைபெற்ற நேரடிப் பேச்சுவார்த்தையைத் தொடர்ந்து இந்த முடிவு எடுக்கப்பட்டுள்ளது. அமெரிக்க துணை அதிபர் ஜே.டி. வான்ஸ் மற்றும் வெளியுறவுத்துறை அமைச்சர் மார்கோ ரூபியோ ஆகியோரின் முன்னிலையில் நடைபெற்ற இச்சந்திப்பு "மிகவும் வெற்றிகரமானது" என்று ட்ரம்ப் விவரித்துள்ளார். இந்த மூன்று வார கால அவகாசத்திற்குள் இஸ்ரேலிய பிரதமர் பெஞ்சமின் நெதன்யாகு மற்றும் லெபனான் அதிபர் ஜோசப் அவுன் ஆகியோர் வெள்ளை மாளிகைக்கு வருகை தந்து அடுத்தகட்ட அமைதிப் பேச்சுவார்த்தைகளில் ஈடுபடுவார்கள் என்றும் எதிர்பார்க்கப்படுகிறது.
ஏற்கனவே நடைமுறையில் இருந்த 10 நாள் போர்நிறுத்தம் வரும் ஞாயிற்றுக்கிழமையுடன் முடிவடைய இருந்த நிலையில், அமெரிக்காவின் இந்தத் தலையீடு மத்திய கிழக்கில் தற்காலிக அமைதியை ஏற்படுத்தியுள்ளது. மேலும், லெபனான் தன்னை தற்காத்துக் கொள்ளவும், ஹிஸ்புல்லா அமைப்பின் ஆதிக்கத்தைக் குறைக்கவும் அமெரிக்கா உதவும் என்றும் ட்ரம்ப் உறுதியளித்துள்ளார்.
