விஷாலின் கம்பேக் படமாக 'மார்க் ஆண்டனி' அமைந்துள்ளது. ஆதிக் ரவிச்சந்திரன் இயக்கத்தில் கடந்த மாதம் 15 ஆம் தேதி வெளியான இப்படம் தொடர்ந்து வசூலில் சக்கை போடு போட்டது. முதல் நாள் ஒபனிங்கிலே அதிக வசூலை குவித்து மாஸ் காட்டியது. இந்நிலையில் 'மார்க் ஆண்டனி' படம் வசூலில் புதிய சாதனை படைத்துள்ளது.
அண்மையில் விஷால் நடிப்பில் வெளியான படங்கள் எதுவும் பெரியளவில் வரவேற்பை பெறவில்லை. இந்நிலையில் தான் ஆதிக் ரவிச்சந்திரனுடன் இணைந்தார். தமிழ் சினிமாவில் 'திரிஷா இல்லன்னா நயன்தாரா' படம் மூலமாக இயக்குனராக அறிமுகம் ஆனவர் ஆதிக். அடல்ட் காமெடி ஜானரில் வெளியான இவரின் முதல் படமே ரசிகர்கள் இடையில் அமோக வரவேற்பை பெற்றது.
இதனையடுத்து இவரது இயக்கத்தில் வெளியான அன்பானவன் அடங்காதவன் அசராதவன், பஹீரா படங்கள் மோசமான விமர்சனத்தை பெற்று வசூலில் சொதப்பியது. இந்த தொடர் தோல்வியை அடுத்து சிறு இடைவேளைக்கு பிறகு 'மார்க் ஆன்டணி' படத்தை இயக்கினார் ஆதிக் ரவிச்சந்திரன். இப்படத்தின் டிரெய்லரே ரசிகர்கள் இடையில் எக்கச்சக்கமான எதிர்பார்ப்பினை கிளப்பி இருந்தது.
கலர்புல்லாக, டைம் டிராவலை மையமாக வைத்து படம் உருவாகி இருப்பது டிரெய்லரிலே தெரிந்தது. இதனால் முதல் நாளில் இருந்தே படத்தை பார்க்க ரசிகர்கள் அதிக ஆர்வம் காட்ட ஆரம்பித்தனர். தொடர்ந்து வந்த பாசிட்டிவ் விமர்சனங்களும் படத்துக்கு சாதகமாக அமைந்தது. முதல் நாளே விஷாலின் திரை வாழ்வில் அதிக வசூலை குவித்த படம் என்ற சாதனையை 'மார்க் ஆண்டனி' படம் படைத்தது.
