திரைத்துறையில் வயது முதிர்வு காரணமாக பெண்களுக்கு எதிராகக் காட்டப்படும் பாகுபாடுகளுக்கு எதிராக பாலிவுட் நடிகை இஷா கோப்பிகர் குரல் கொடுத்துள்ளார். தனது இன்ஸ்டாகிராம் பக்கத்தில் அவர் பகிர்ந்துள்ள வீடியோவில், திரைத்துறையில் வயது முதிர்ந்த ஆண் நடிகர்கள் தங்களை விட பல வயது குறைந்த இளம் பெண்களுடன் ஜோடியாக நடிப்பது மிகவும் சாதாரணமாக ஏற்றுக்கொள்ளப்படும் நிலையில், பெண் நடிகைகளின் வயது முதிர்வை மட்டும் ஏன் ஒரு குறையாகப் பார்க்கிறார்கள் என்று அவர் கேள்வி எழுப்பியுள்ளார்.
ஆண்களின் வயது முதிர்வு அனுபவமாகக் கருதப்படும் வேளையில், பெண்களின் வயது முதிர்வு மட்டும் ஒரு பிரச்சனையாகப் பார்க்கப்படுவது விசித்திரமானது என்று அவர் குறிப்பிட்டுள்ளார். ஒரு பெண் ஸ்டைலாகவும், தன்னம்பிக்கையுடனும், தனது தனித்துவத்தைக் கொண்டாடும்போதும், 'இந்த வயதிற்கு ஏற்றவாறு நடந்துகொள்ளுங்கள்' என்று அறிவுறுத்தப்படுவதைச் சுட்டிக்காட்டிய அவர், வயது என்பது பலவீனம் அல்ல, அது வலிமையின் அடையாளம் என்றும், பெண்களின் கண்ணியத்திற்கும் தன்னம்பிக்கைக்கும் எந்தவொரு காலாவதி தேதியும் கிடையாது என்றும் அழுத்தமாகக் கூறியுள்ளார். தோற்றத்தைக் கொண்டு பெண்களை மதிப்பிடுவதைத் தவிர்த்து, அவர்களின் வாழ்க்கைப்பயணத்தையும் மனவலிமையையும் மதிக்க வேண்டும் என்று அவர் கேட்டுக்கொண்டுள்ளார்.
