சென்னை, மார்ச் 11 –
நடிகர் ரவி மோகன் (ஜெயம் ரவி) நடிப்பில் உருவாகி வரும் புதிய திரைப்படத்தின் தலைப்பு தொடர்பாக நிலவி வந்த சட்டப் போராட்டம் ஒரு சுமுகமான முடிவுக்கு வந்துள்ளது. 'ப்ரோ கோட்' (Bro Code) என்ற தலைப்பைப் பயன்படுத்தப் போவதில்லை என ரவி மோகனின் தயாரிப்பு நிறுவனம் அதிகாரப்பூர்வமாக அறிவித்துள்ளது.
ரவி மோகன் நடிப்பில், எஸ்.ஜே.சூர்யா மற்றும் அர்ஜுன் அசோகன் உள்ளிட்டோர் நடிக்கும் இந்தப் படத்திற்கு 'Bro Code' எனப் பெயரிடப்பட்டிருந்தது. ஆனால், 'இண்டோஸ்பிரிட் பெவரேஜஸ்' (IndoSpirit Beverages Private Limited) என்ற தனியார் நிறுவனம், 'Bro Code' என்பது தங்களுடைய பதிவு செய்யப்பட்ட வர்த்தக முத்திரை (Trademark) என்றும், அதனைத் திரைப்படத் தலைப்பாகப் பயன்படுத்தக் கூடாது என்றும் டெல்லி உயர் நீதிமன்றத்தில் வழக்குத் தொடர்ந்தது.
கடந்த ஆண்டு அக்டோபர் மாதம், இந்தத் தலைப்பைப் பயன்படுத்த இடைக்காலத் தடையுத்தரவை நீதிமன்றம் பிறப்பித்திருந்தது. இந்நிலையில், டெல்லி உயர் நீதிமன்ற மத்தியஸ்த மையத்தின் (Mediation Centre) முன்னிலையில் இரு தரப்பினருக்கும் இடையே பேச்சுவார்த்தை நடைபெற்றது. இதன் முடிவில், படத்தின் தலைப்பை மாற்றிக் கொள்வதாக ரவி மோகன் தரப்பு ஒப்புக்கொண்டது.
இந்தத் தீர்வைத் தொடர்ந்து, டெல்லி உயர் நீதிமன்றத்தில் வழக்கு முடித்து வைக்கப்பட்டது. மேலும், இது தொடர்பாகச் சென்னை உயர் நீதிமன்றத்தில் ரவி மோகன் தொடர்ந்திருந்த வழக்குகளையும் அவர் திரும்பப் பெற்றுக்கொண்டார். இனி படத்தின் விளம்பரப் பொருட்கள், போஸ்டர்கள் மற்றும் இணையதளக் குறிப்புகள் அனைத்திலிருந்தும் 'Bro Code' என்ற பெயர் நீக்கப்படும்.
விரைவில் இந்தப் படத்திற்கான புதிய தலைப்பைத் தயாரிப்பு நிறுவனம் அறிவிக்கும் என்று எதிர்பார்க்கப்படுகிறது. நீண்ட நாட்களாக இழுபறியில் இருந்த இந்தத் தலைப்புச் சர்ச்சை தற்போது முடிவுக்கு வந்துள்ளது திரைத்துறையில் கவனத்தைப் பெற்றுள்ளது.
