முன்னாள் பிரதமர் டத்தோ ஶ்ரீ நஜிப் ரஸாக்கை வீட்டுக் காவலில் வைப்பது தொடர்பாக நீதிமன்ற உத்தரவும், மன்னிப்பு வாரியத்தின் உத்தரவும் வெவ்வேறு விளக்கங்களைக் கொண்டிருப்பதால் சட்டச் சிக்கல் ஏற்படக்கூடும் என உள்துறை அமைச்சர் டத்தோ ஶ்ரீ சைஃபுடின் நசுத்தியோன் இஸ்மாயில் தெரிவித்துள்ளார்.
எஸ்ஆர்ஸி இண்டர்நேஷனல் வழக்கில் விதிக்கப்பட்ட 50 மில்லியன் ரிங்கிட் அபராதத்தைச் செலுத்திய பின்னர், எஞ்சிய சிறைத் தண்டனையை வீட்டுக் காவலில் அனுபவிக்க நஜிப்புக்கு நிபந்தனை மன்னிப்பு வழங்கப்பட்டுள்ளது.
ஆனால், நீதிமன்ற உத்தரவில் 'விடுவித்தல்' என்றும், மன்னிப்பு வாரியத்தின் உத்தரவில் 'வீட்டுக் காவல்' என்றும் குறிப்பிடப்பட்டுள்ளதால், உரிய தெளிவின்றி வீட்டுக் காவலில் வைப்பது சட்டவிரோத தடுப்புக் காவலாக அமையக்கூடும் என அவர் அச்சம் தெரிவித்துள்ளார்.
மேலும், வீட்டுக் காவல் என்பது விடுதலை செய்வதிலிருந்து முற்றிலும் மாறுபட்டது என்றும், இந்த விவகாரத்தில் ஏதேனும் தெளிவற்ற நிலை இருந்தால் நீதிமன்றத்தின் விளக்கத்தைக் கோருவோம் என்றும் பெங்காலான் கிலிங் பகுதியில் நேற்று மீனவர்களைச் சந்தித்த பின்னர் செய்தியாளர்களிடம் பேசிய சைஃபுடின் நசுத்தியோன் இஸ்மாயில் இத்தகவலைப் பகிர்ந்துள்ளார்.
