வட ஆப்பிரிக்க சந்தையை இலக்காகக் கொண்டு, மலேசியாவை ஒரு முதன்மையான சுற்றுலாத் தலமாக விளம்பரப்படுத்தும் நோக்கில் 'மலேசியா சுற்றுலா வாரியம்' தீவிரமான பிரச்சாரங்களை மேற்கொண்டுள்ளது. 'மலேசியாவுக்கு வருகை தாருங்கள் 2026' எனும் பிரச்சாரத்தின் ஒரு பகுதியாக, அல்ஜீரியாவின் அல்ஜியர்ஸ் நகரில் நடைபெற்ற 25-வது சர்வதேச சுற்றுலா மற்றும் பயணக் கண்காட்சியில் (SITEV 2026) மலேசியா பங்கேற்றது.
வட ஆப்பிரிக்க பிராந்தியத்தில் இருந்து, குறிப்பாக அல்ஜீரியாவில் இருந்து மலேசியாவுக்கு வரும் சுற்றுலாப் பயணிகளின் எண்ணிக்கை தொடர்ந்து அதிகரித்து வருகிறது. கடந்த 2024-ஆம் ஆண்டுடன் ஒப்பிடுகையில், 2025-ஆம் ஆண்டில் அல்ஜீரியப் பயணிகளின் வருகை 14.53 விழுக்காடு அதிகரித்து 19,636 ஆகப் பதிவாகியுள்ளது. இந்த வளர்ச்சி 2026-ஆம் ஆண்டின் முதல் காலாண்டிலும் தொடர்ந்து நீடிக்கிறது.
அல்ஜியர்ஸ் மற்றும் கோலாலம்பூர் இடையே வாரத்திற்கு மூன்று முறை இயக்கப்படும் 'ஏர் அல்ஜீரி' நேரடி விமானச் சேவை இந்த எண்ணிக்கையின் வளர்ச்சிக்கு முக்கியக் காரணியாக அமைந்துள்ளது. இக்கண்காட்சியின் மூலம் வணிக சந்திப்புகள் (B2B sessions) மற்றும் நெட்வொர்க்கிங் நிகழ்வுகள் நடத்தப்பட்டு வர்த்தக உறவுகள் பலப்படுத்தப்பட்டுள்ளன.
இயற்கை எழில் கொஞ்சும் தீவுகள், பழமையான காடுகள், சொகுசு வணிக வளாகங்கள், உலகத்தரம் வாய்ந்த உணவுகள் மற்றும் முஸ்லிம்களுக்கு உகந்த சூழல் ஆகியவற்றுடன் 90 நாட்கள் வரை விசா இல்லாத நுழைவு அனுமதியும் வழங்குவதால், வட ஆப்பிரிக்கப் பயணிகளுக்கு மலேசியா ஒரு விருப்பமான சுற்றுலாத் தலமாகத் திகழ்கிறது என்று மலேசியா சுற்றுலா வாரியத்தின் செயல் துணை இயக்குநர் ஜெனரல் விஸானி ரோஸ்மின் தெரிவித்துள்ளார்.
