பெர்லிஸ் மாநிலம் ஆராவ் பகுதியில், பாலியல் சுரண்டலுக்கு ஆளானதாகக் கருதப்படும் 16 வயது சிறுமியை போலீசார் மீட்டதுடன், இது தொடர்பாக இரண்டு ஆடவர்களைக் கைது செய்துள்ளனர்.
இது குறித்து அம்மாநில போலீஸ் தலைவர் ஹம்ஸா ஹாஷிம் கூறுகையில், கிடைத்த தகவல்கள் மற்றும் விசாரணைகளின் அடிப்படையில், ஆராவ் பகுதியில் உள்ள ஓர் இடத்தில் போலீசார் சோதனை நடத்தி, அச்சிறுமியை மீட்டதாகத் தெரிவித்துள்ளார்.
மேலும், சமூக ஊடகச் செயலி மூலம் விபச்சார நடவடிக்கைகளை விளம்பரப்படுத்தியதுடன், சிறுமியைப் பாலியல் தேவைகளுக்காகச் சுரண்டியதாக, கைது செய்யப்பட்ட இருவர் மீது போலீசார் சந்தேகிக்கின்றனர்.
இந்தச் சம்பவம், மனிதக் கடத்தல் மற்றும் புலம்பெயர்ந்தோர் கடத்தல் தடுப்புச் சட்டத்தின் பிரிவு 14 மற்றும் குற்றவியல் சட்டம் பிரிவு 372 ஆகியவற்றின் கீழ் விசாரிக்கப்பட்டு வருகின்றது.
