மலேசிய எல்லைக் கட்டுப்பாடு மற்றும் பாதுகாப்பு முகமையான ஏகேபிஎஸ்ஸின் தலைமை இயக்குநர் ஷுஹய்லி ஸையின், இரண்டு போலீஸ் அதிகாரிகளைத் தாக்கியதாகத் தொடரப்பட்ட வழக்கில், நீதிமன்றத்தில் இன்று தன் மீதான குற்றச்சாட்டுகளை மறுத்து விசாரணை கோரினார்.
கடந்த செப்டம்பர் 28-ஆம் தேதி, கேஎல்ஐஏ முனையம் ஒன்றில், ஃபாயிஸ் சாமான் மற்றும் எக்மால் சோஃப்வான் ஆகிய இரண்டு போலீஸ் அதிகாரிகளைத் தாக்கி காயப்படுத்தியதாக, குற்றவியல் சட்டம் பிரிவு 323-ன் கீழ் அவர் மீது இரண்டு குற்றச்சாட்டுகள் சுமத்தப்பட்டுள்ளன.
இந்தக் குற்றச்சாட்டுகள் நிரூபிக்கப்பட்டால், ஒவ்வொரு குற்றத்திற்கும் அதிகபட்சம் ஓராண்டு சிறைத்தண்டனை அல்லது 2,000 ரிங்கிட் அபராதம் அல்லது இரண்டும் விதிக்கப்படலாம்.
இந்த வழக்கில் ஷுஹய்லி ஸையினுக்கு இரண்டு நபர்களின் உத்தரவாதத்துடன் மொத்தம் 3,000 ரிங்கிட் பிணை வழங்கி நீதிபதி கைராதுல் அனிமா ஜெலானி உத்தரவிட்டார்.
மேலும், வழக்கின் அடுத்தகட்ட நடவடிக்கைகளுக்காக நவம்பர் 25-ஆம் தேதியை நீதிமன்றம் நிர்ணயித்துள்ளது.
