நாட்டில் நிலவும் புகைமூட்டம் காரணமாகப் பள்ளிகளை மூட வேண்டிய நிலை ஏற்பட்டால், கல்வி அமைச்சு, சுகாதார அமைச்சு, இயற்கை வளம் மற்றும் சுற்றுச்சூழல் நிலைத்தன்மை அமைச்சு ஆகிய மூன்றும் இணைந்து முடிவெடுக்கும் என்று கல்வி அமைச்சர் டத்தோ ஶ்ரீ ஃபாட்லீனா சீடேக் தெரிவித்துள்ளார்.
காற்றுத் தரக் கண்காணிப்பு, மாணவர்களின் உடல்நலம் மற்றும் பாதுகாப்பு ஆகியவற்றின் அடிப்படையில் முடிவு எடுக்கப்படும் என்ற அவர், பள்ளிகள் நீண்டகாலம் மூடப்பட்டால் மாணவர்களின் கல்வி பாதிக்கப்படுவதையும் கருத்தில் கொள்ள வேண்டியுள்ளதாகக் குறிப்பிட்டார்.
மூன்று அமைச்சுகளும் தத்தமது நிபுணத்துவத்தின் அடிப்படையில் நிலைமையை மதிப்பிட்டு முடிவெடுக்கும் என்றும், புகைமூட்டம் நீடிக்காமல் இருக்க வேண்டும் எனத் தாம் நம்புவதாகவும் ஃபாட்லீனா தெரிவித்தார்.
கோலாலம்பூரில் இன்று நடைபெற்ற 2026-ஆம் ஆண்டு பகடிவதைத் தடுப்புச் சட்டம் தொடர்பான விழிப்புணர்வு நிகழ்ச்சிக்குப் பின்னர் அவர் இதனைத் தெரிவித்தார்.
