அந்நிய நாட்டவர்கள், வாகனங்களைத் தங்கள் பெயரில் பதிவு செய்வதற்கான கடுமையான நடவடிக்கைகளைத் தவிர்க்க, 60 வயதுக்கு மேற்பட்ட மலேசியப் பெண்களை குறிப்பாக மூதாட்டிகளை திருமணம் செய்யும் உத்தியை கையாண்டு வருவதாக சாலைப் போக்குவரத்துத் துறையான ஜேபிஜே தெரிவித்துள்ளது.
கணவனை இழந்தவர்கள், தனித்து வாழும் தாய்மார்கள், மற்றும் திருமணமாகாத பெண்கள் மற்றும் மூதாட்டிகளை இலக்காக கொண்டு திருமணம் செய்வதாக வாக்குறுதி அளித்து, அவர்களின் பெயர்களில் வாகனங்களைப் பதிவு செய்வதாக ஜேபிஜேவின் மூத்த அமலாக்க இயக்குநர் டத்தோ முஹமட் கிஃப்லி மா ஹாசான் தெரிவித்தார். கடந்த ஜூலை மாதம் முதல் வெளிநாட்டினருக்கு எதிரான அமலாக்க நடவடிக்கைகள் தீவிரப்படுத்தப்பட்டதைத் தொடர்ந்து இந்தப் புதிய உத்தி கண்டறியப்பட்டதாக அவர் கூறினார்.
புத்ராஜெயாவில் இன்று நடைபெற்ற நிகழ்ச்சியின்போது செய்தியாளர்களிடம் பேசிய அவர், ‘ஓப் பேவா’ நடவடிக்கையின்கீழ் வாகன ஓட்டுநர் மட்டுமின்றி, வாகன உரிமையாளரும் சட்ட நடவடிக்கையை எதிர்கொள்ள நேரிடும் என்றார்.
சம்பந்தப்பட்ட வாகனங்கள் பறிமுதல் செய்யப்படுவதுடன், அபராதத் தொகையைச் செலுத்தி வழக்கிலிருந்து தப்பிக்க அனுமதிக்கப்பட மாட்டாது; நீதிமன்றத்தில் வழக்கு தொடரப்படும் என்றும் அவர் எச்சரித்தார்.
