போலீஸ் காவலில் உயிரிழந்த 42 வயது நூரிஸ்வான் ஸுல்கிஃப்லி மரணம் தொடர்பில், எவ்வித சமரசமுமின்றி முழுமையான, வெளிப்படையான விசாரணை நடத்த பிரதமர் டத்தோ ஸ்ரீ அன்வார் இப்ராஹிம் போலீஸ் துறைக்கு உத்தரவிட்டுள்ளார்.
இன்று தம்மிடம் மேல்முறையீட்டு மனு அளிக்க வந்த உயிரிழந்தவரின் குடும்பத்தினரின் துயரத்தையும் வேதனையையும் புரிந்து கொள்வதாகவும், அவரது மரணத்துக்கான காரணங்களை அறியக் குடும்பத்தினர் காத்திருப்பதாகவும் அன்வார் தெரிவித்துள்ளார். இது குறித்து அவர் தமது ஃபேஸ்புக் பதிவில் இரங்கலையும் தெரிவித்துள்ளார்.
கடந்த செப்டம்பர் 20ஆம் தேதி கைது செய்யப்பட்ட நூரிஸ்வான், செராஸ் போலீஸ் தலைமையகத்தில் 11 நாட்கள் தடுத்து வைக்கப்பட்டிருந்தார். அவரது கைது மற்றும் தடுப்புக் காவல் குறித்து தங்களுக்குத் தெரிவிக்கப்படவில்லை எனக் குடும்பத்தினர் குற்றஞ்சாட்டியுள்ளனர். செப்டம்பர் 30ஆம் தேதி இரவு 9.30 மணிக்கு ஆபத்தான நிலையில் மருத்துவமனைக்குக் கொண்டு செல்லப்பட்ட அவர், அக்டோபர் 1ஆம் தேதி அதிகாலை 1.52 மணிக்கு உயிரிழந்ததாக அறிவிக்கப்பட்டது.
