கோலாலம்பூர் கெப்போங் பகுதியில் பாராங்கத்தியால் தாக்கப்பட்டு வலது கை துண்டிக்கப்பட்ட போலீஸ் அதிகாரிக்கு வெற்றிகரமாக அறுவைச் சிகிச்சை செய்து, கையை மீண்டும் பொருத்திய கோலாலம்பூர் மருத்துவமனையான எச்கேஎல் மருத்துவர்களுக்குப் பிரதமர் டத்தோ ஶ்ரீ அன்வார் இப்ராஹிம் பாராட்டு தெரிவித்துள்ளார்.
சிக்கலான இந்த அறுவைச் சிகிச்சையை வெற்றிகரமாக மேற்கொண்ட அறுவைச் சிகிச்சை மற்றும் மறுவாழ்வுக் குழுவினரின் திறமை பாராட்டுக்குரியது என்றும் அவர் குறிப்பிட்டார்.
கோம்பாக் மாவட்ட போலீஸ் தலைமையகத்தில் பணியாற்றும் 26 வயதான லான்ஸ் கோப்ரல் தியேரி ராட்கேர் ஃபெண்டி, கடந்த புதன்கிழமை டெசா அமான் பூரி பகுதியில் வெளிநாட்டு ஆடவர் ஒருவருடன் ஏற்பட்ட மோதலில் வலது கையை இழந்தார்.
அவருக்கு எச்கேஎல் மருத்துவமனையின் நுண் அறுவைச் சிகிச்சை நிபுணர்களான டாக்டர் எலன் ரவி ராஜகோபால் மற்றும் டாக்டர் அஸிஸ் சபீர் ஹுசேன் தலைமையில், சுமார் 8 மணி நேரம் அறுவைச் சிகிச்சை மேற்கொண்டு கையை மீண்டும் பொருத்தினர்.
இதற்கிடையில், குற்றச்செயல்களுக்கு எதிராக அரசாங்கம் எவ்வித சமரசமும் செய்து கொள்ளக்கூடாது என்றும், நாட்டின் பாதுகாப்புப் படையினருக்கு உறுதியான ஆதரவு வழங்கப்பட வேண்டும் என்றும் அமைச்சரவைக் கூட்டத்தில் வலியுறுத்தியதாக அன்வார் தெரிவித்தார்.
