கோலாலம்பூர், கெப்போங் பகுதியில் உள்ள அடுக்குமாடிக் குடியிருப்பில், போலீஸ் அதிகாரி ஒருவரின் வலது கையை வெட்டித் துண்டித்த தாக்குதலில் ஈடுபட்டு, பின்னர் போலீஸ் துறையினரால் சுட்டுக் கொல்லப்பட்ட வெளிநாட்டவரின் கடப்பிதழ் காலாவதியானது தெரியவந்துள்ளது.
சந்தேக நபர் மாணவர் அனுமதிச் சீட்டைப் பயன்படுத்தி மலேசியாவுக்குள் நுழைந்ததாகவும், அனுமதிக்கப்பட்ட காலத்தைக் கடந்து நாட்டில் தங்கியிருந்ததாகவும் சிலாங்கூர் போலீஸ் துறைத் தலைவர் டத்தோ ஷாஸெலி கஹார் தெரிவித்தார்.
அவரது மாணவர் அனுமதிச் சீட்டும் கடப்பிதழும் காலாவதியாகியிருந்ததால், அவர் சட்டவிரோதக் குடியேறியாக நாட்டில் தங்கியிருந்ததாக நம்பப்படுவதாகவும் அவர் கூறினார்.
32 வயதான அந்த ஆடவர், 2015 முதல் 2018ஆம் ஆண்டு வரை மாணவர் அனுமதிச் சீட்டு வைத்திருந்ததாக குடிநுழைவுத் துறை மேற்கொண்ட சோதனையில் தெரியவந்துள்ளது.
கடந்த புதன்கிழமை இரவு, இரண்டு பாராங்கத்திகளுடன் போலீஸ் அதிகாரியைத் தாக்கியதில், 26 வயதான லான்ஸ் கோப்ரல் ஒருவரின் வலது மணிக்கட்டு துண்டிக்கப்பட்டது.
தப்பியோடிய சந்தேக நபர், பின்னர் போலீஸ் துறையினரை மீண்டும் தாக்க முயன்றபோது சுடப்பட்டார். அவர் மருத்துவமனைக்குக் கொண்டு செல்லப்பட்டதும் உயிரிழந்ததாக அறிவிக்கப்பட்டது.
