தனது 14 வயது ஆண் மாணவனுக்கு எதிராக ஆறு முறை உடல்ரீதியான பாலியல் தொல்லை அளித்ததாக 25 வயதுடைய பயிற்சி ஆசிரியர் முகமது மிஃப்சால் முகமட் ஜலானி ஷாம் என்பவர் மீது ஈப்போ செஷன் நீதிமன்றத்தில் ஆறு குற்றச்சாட்டுகள் சுமத்தப்பட்டுள்ளன. நீதிபதி அய்னுல் ஷஹ்ரின் முகமது முன்னிலையில் நடத்தப்பட்ட இந்த வழக்கில், அவர் தன் மீதான குற்றச்சாட்டுகளை மறுத்து விசாரணை கோரியுள்ளார்.
ஈப்போ - கம்பங் சாகாடி, பெர்சியாரான் குந்தோங் (S) 1/9 பகுதியில் உள்ள ஒரு வீட்டில் இந்தச் சம்பவம் நடந்ததாகக் கூறப்படும் நிலையில், 2017 ஆம் ஆண்டின் குழந்தைகளுக்கு எதிரான பாலியல் குற்றங்கள் சட்டம் 792 பிரிவு 14(a) மற்றும் 14(b)-இன் கீழ் இந்த வழக்குகள் பதிவு செய்யப்பட்டுள்ளன.
குற்றம் நிரூபிக்கப்பட்டால் அவருக்கு அந்தச் சட்டத்தின் கீழ் அதிகபட்சமாக 20 ஆண்டுகள் சிறைத்தண்டனையும் பிரம்படியும் விதிக்கப்படலாம். நீதிமன்றம் ஒரு ஜாமீன்தாரருடன் 10,000 ரிங்கிட் பிணையில் செல்ல அவரை அனுமதித்ததுடன், ஒவ்வொரு மாதமும் அருகில் உள்ள போலீஸ் நிலையத்தில் ஆஜராக வேண்டும் என்றும், பாதிக்கப்பட்ட மாணவரை எந்த விதத்திலும் தொடர்பு கொள்ளவோ அல்லது தொந்தரவு செய்யவோ கூடாது என்றும் நிபந்தனை விதித்துள்ளது.
அரசுத் தரப்பில் துணை வழக்கறிஞர் எம். ரவீனா மற்றும் குற்றஞ்சாட்டப்பட்டவர் சார்பில் வழக்கறிஞர் அமீர் பிர்தாஸ் முகமட் அமீர் ஆஜராகிய இந்த வழக்கின் ஆவணங்களைச் சமர்ப்பிப்பதற்கான அடுத்த விசாரணை ஆகஸ்ட் 20 ஆம் தேதிக்கு ஒத்திவைக்கப்பட்டுள்ளது.
