மங்கோலியாவில் இருந்து இறக்குமதி செய்யப்பட்ட 83 ஆயிரம் கிலோ சாப்பிடத் தகுதியற்ற விலங்குக் கொழுப்பு எண்ணெயை, பாசீர் கூடாங் துறைமுகத்தில் மலேசிய எல்லைக் கட்டுப்பாடு மற்றும் பாதுகாப்பு முகமையான ஏகேபிஎஸ் பறிமுதல் செய்துள்ளது.
இதன் மதிப்பு 3 லட்சத்து 10 ஆயிரத்து 606.26 ரிங்கிட் எனத் தெரிவிக்கப்பட்டுள்ளது.
நான்கு பெரிய நெகிழ்வுத் தொட்டிகளில் கொண்டுவரப்பட்ட இந்தப் பொருட்களை, நேற்று வெள்ளிக்கிழமை காலை 10 மணியளவில் அமலாக்க அதிகாரிகள் சோதனையிட்டபோது கண்டுபிடித்தனர்.
மேலும், நடைமுறையில் உள்ள சட்டங்கள் மற்றும் விதிமுறைகளின்படி, இறக்குமதி அனுமதி பெறாமல் இந்தப் பொருட்கள் கொண்டுவரப்பட்டது தெரிய வந்ததாக ஏகேபிஎஸ் தெரிவித்துள்ளது.
இதனையடுத்து, மேலதிக விசாரணைக்காக அந்தப் பொருட்களானது தடுத்து வைக்கப்பட்டுள்ளதாக இன்று சனிக்கிழமை வெளியிட்ட அறிக்கையில் கூறப்பட்டுள்ளது.
