கோலாலம்பூர், ஏப்ரல்.20-
தலைநகரில் உள்ள உரிமம் பெறாத வணிகர்களை முறைப்படுத்தும் நடவடிக்கையை கோலாலம்பூர் மாநகராட்சி மன்றம் இந்த ஆகஸ்ட் மாதத்திற்குள் முடிக்க வேண்டும் என்று கூட்டரசு பிரதேசத்திற்கான பிரதமர் துறை அமைச்சர் டத்தோ ஶ்ரீ டாக்டர் ஸாலிஹா முஸ்தாஃபா தெரிவித்துள்ளார். உரிமம் இல்லாத அனைத்து வணிகர்களும் இந்த கால வரையறைக்குள் பதிவு செய்து நிர்ணயிக்கப்பட்ட நடைமுறைகளைப் பின்பற்ற வேண்டும் என்றும் அவர் கேட்டுக் கொண்டார். இது முழுமையான மன்னிப்பு அல்ல என்றும், நிலைமையைச் சரிசெய்து சட்டப்பூர்வமாக வணிகம் செய்ய ஒரு வாய்ப்பு என்றும் அவர் குறிப்பிட்டார்.
இந்த காலக்கெடுவுக்குப் பிறகும் உரிமம் பெறாத வணிகர்கள் தொடர்ந்து செயல்பட்டால், கடுமையான சட்ட நடவடிக்கை எடுக்கப்படும் என்று அமைச்சர் எச்சரித்தார். இந்த நடவடிக்கை, இரண்டு ஆண்டுகளாக செயல்படுத்தப்பட்டு வரும் லெஸ்தாரி நியாகா திட்டத்தின் ஒரு பகுதியாகும். சட்டத்தை மீறுபவர்கள் யாராக இருந்தாலும் பாகுபாடின்றி நடவடிக்கை எடுக்கப்பட வேண்டும் என்றும், அதே நேரத்தில் அமலாக்க நடவடிக்கைகள் நியாயமானதாகவும், தற்போதைய சவால்களுக்கு ஏற்றதாகவும் இருக்க வேண்டும் என்றும் அவர் வலியுறுத்தினார்.
