நாளை மறுநாள் செப்டம்பர் 9 ஆம் தேதி நடைபெறவிருக்கும் ஜோகூர், பூலாய் நாடாளுமன்றத் தொகுதி மற்றும் சிம்பாங் ஜெராம் சட்டமன்றத் தொகுதி இடைத் தேர்தல்களை முன்னிட்டு சிங்கப்பூரில் வேலை செய்யும் ஜோகூர்வாசிகள் நாட்டிற்கு திரும்புவதற்கு வசதியாக நாளை வெள்ளிக்கிழமை ஜோகூர் பாருவில் உள்ள மலேசிய குடிநுழைவு இலாகாவின் அனைத்து முகப்பிடங்களும் திறக்கப்படும் என்று அதன் இயக்குநர் பஹாருடின் தாஹிர் தெரிவித்துள்ளார்.
மலேசியர்கள், சிங்கப்பூரிலிருந்து ஜோகூருக்கு வருவதற்கும், ஜோகூரிலிருந்து சிங்கப்பூருக்கு திரும்புவதற்கும் குடிநுழைவுத்துறையின் 236 முகப்பிடங்கள் உள்ளன. இவற்றில் மோட்டார் சைக்கிள்களுக்காக 100 முகப்பிடங்களும், கார்களுக்காக 60 முகப்பிடங்களும், பேருந்துகளுக்காக 36 முகப்பிடங்களும் திறக்கப்படும் என்று பஹாருடின் தாஹிர் குறிப்பிட்டுள்ளார்.
