நாடாளுமன்றத்தில் பொருத்தமற்ற சொற்களைப் பயன்படுத்திய விவகாரம் தொடர்பாக, துணைப் பொதுப்பணித்துறை அமைச்சர் அஹ்மாட் மஸ்லான் தெரிவித்த மன்னிப்பை பிரதமர் டத்தோ ஶ்ரீ அன்வார் இப்ராஹிம் ஏற்றுக் கொண்டுள்ளார்.
இருப்பினும், அரசாங்க நிர்வாகத்தில் கண்ணியமும் ஒழுக்கமும் எப்போதும் பேணப்பட வேண்டும் என அவர் எச்சரித்துள்ளார்.
அரசியல் பிரசாரங்களின்போது உணர்ச்சிவசப்பட்டு சிலர் தவறான வார்த்தைகளைப் பயன்படுத்தக்கூடும் என்பதைத் தாம் புரிந்து கொள்வதாகக் குறிப்பிட்ட அன்வார், அத்தகைய அணுகுமுறை அரசாங்கத்தின் அதிகாரப்பூர்வ நடவடிக்கைகளில் இடம் பெறக்கூடாது என்றார்.
அரசாங்கத்தின் முடிவுகளில் கருத்து வேறுபாடு இருந்தால், அதனை அமைச்சரவைக் கூட்டத்தில் முன்வைக்கலாம் என்றும் அவர் தெரிவித்தார்.
மேலும், அஹ்மாட் மஸ்லான் நவம்பர் 17ஆம் தேதி அதிகாரப்பூர்வமாக மன்னிப்புக் கடிதம் அனுப்பியதைத் தொடர்ந்து, அவரது நடவடிக்கையை ஏற்றுக் கொண்டதாகவும், இதுபோன்ற சம்பவங்கள் மீண்டும் நிகழக்கூடாது என்றும் டத்தோ ஸ்ரீ அன்வார் இப்ராஹிம் வலியுறுத்தினார்.








