பேரா, தம்புனில் இன்று அதிகாலை போலீஸ் துறையினருடன் நடந்த துப்பாக்கிச் சண்டையில் உயிரிழந்த 39 வயது ஆடவர், ஆயுதக் கொள்ளைக் கும்பலின் தலைவன் எனச் சந்தேகிக்கப்படுகிறார்.
அவருக்கு கொள்ளை, போதைப்பொருள் மற்றும் வீடு உடைத்துத் திருடுதல் உள்ளிட்ட 17 குற்றப் பதிவுகள் இருப்பதாக புக்கிட் அமானின் குற்றப் புலனாய்வுத் துறை இயக்குநர் டத்தோ எம். குமார் தெரிவித்தார்.
மேலும், கடந்த ஓராண்டில் பேராக், மலாக்கா, பினாங்கு மற்றும் சிலாங்கூரில் நடைபெற்ற சுமார் 22 வீடு புகுந்து கொள்ளையடித்த சம்பவங்களில் இந்தக் கும்பலுக்குத் தொடர்பு இருப்பதாகவும் அவர் கூறினார்.
சம்பவத்தின்போது போலீஸ் துறையினரை நோக்கி அந்த ஆடவர் துப்பாக்கியால் சுட்டதாகவும், அதற்குப் பதிலடி வழங்கப்பட்டதாகவும் தெரிவிக்கப்பட்டது.
சம்பவ இடத்தில் துப்பாக்கி, தோட்டாக்கள், கத்திகள் மற்றும் ஷாபு போதைப்பொருள் எனச் சந்தேகிக்கப்படும் பொருளும் கைப்பற்றப்பட்டன.
இந்தக் கும்பலுடன் தொடர்புடைய மேலும் நான்கு பேரை போலீசார் தேடி வருகின்றனர்.








