முன்னாள் பிரதமர் துன் டாக்டர் மகாதீர் முஹமட்டை, மலேசியாவுக்கான ஜோர்டான் தூதர் டாக்டர் இஸ்மாயில் மடால்லா சுலிமான் மாய்தா சந்தித்துக் கலந்துரையாடியுள்ளார்.
கடந்த செவ்வாய்க்கிழமை பெர்டானா தலைமைத்துவ அறக்கட்டளையில் நடைபெற்ற இச்சந்திப்பின்போது, அண்மையில் மறைந்த துன் டாக்டர் ஹஸ்மா முஹமட் அலியின் மறைவுக்கு ஜோர்டான் தூதர் இரங்கல் தெரிவித்தார்.
மேலும், ஜோர்டானில் அரசியல் அறிவியல் பயின்றபோது துன் டாக்டர் மகாதீரின் தலைமைத்துவமும் நிர்வாக அணுகுமுறையும் தமக்கு முன்மாதிரியாக இருந்ததாக அவர் குறிப்பிட்டார்.
கடந்த அக்டோபர் 11 மற்றும் 12ஆம் தேதிகளில் ஜோர்டான் மன்னர் ராஜா அப்துல்லா II இப்ன் அல்-ஹுசேன் மலேசியாவுக்கு மேற்கொண்ட அரசுமுறைப் பயணம் குறித்தும் இச்சந்திப்பில் கலந்துரையாடப்பட்டது.
அந்தப் பயணத்தின்போது கல்வித்துறையில் ஒத்துழைப்பை அதிகரிப்பது, இரு நாடுகளுக்கிடையிலான மாணவர் பரிமாற்றத்தை விரிவுபடுத்துவது உள்ளிட்ட அம்சங்கள் ஒப்புக் கொள்ளப்பட்டன.
மேலும், ஜோர்டான் தூதர், மலேசியா – ஜோர்டான் உறவுகளைத் தொடர்ந்து வலுப்படுத்தும் முயற்சிகளை முன்னெடுக்க வேண்டும் என துன் டாக்டர் மகாதீர் நம்பிக்கை தெரிவித்துள்ளார்.








