கிழக்குக் கரையோர மாநிலங்களுக்கான ரயில் இணைப்புத் திட்டமான இசிஆர்எல் முதற்கட்டப் பயணிகள் சேவை, வரும் டிசம்பர் 12ஆம் தேதி திட்டமிட்டபடி தொடங்கப்படும் எனத் துணைப் போக்குவரத்து அமைச்சர் ஹாபிட் ஹாபிபோல்லா தெரிவித்துள்ளார்.
இவ்விழாவைப் பிரதமர் டத்தோ ஶ்ரீ அன்வார் இப்ராஹிம் அதிகாரப்பூர்வமாகத் தொடங்கி வைப்பார் என்றும் அவர் குறிப்பிட்டார்.
போக்குவரத்து அமைச்சராக இருந்த அந்தோணி லோக், பதவி விலகியுள்ள நிலையில், புதிய ரயில் சேவையைத் தொடங்க அமைச்சரின் ஒப்புதல் அவசியமா என முன்னாள் போக்குவரத்து அமைச்சர் வீ கா சியோங் கேள்வி எழுப்பினார்.
இதற்குப் பதிலளித்த ஹாபிட் ஹாபிபோல்லா, அடுத்த ஒரு வாரத்திற்குள் புதிய போக்குவரத்து அமைச்சர் நியமிக்கப்படலாம் என நம்பிக்கை தெரிவித்தார்.
523 கிலோமீட்டர் நீளமுள்ள முதற்கட்ட இசிஆர்எல் ரயில் பாதை, கிளந்தான் மாநிலம் கோத்தா பாரு முதல் சிலாங்கூர் மாநிலம் கோம்பாக் வரை 16 நிலையங்களைக் கொண்டுள்ளது.








