இணையக் குற்றக் கும்பலுடன் தொடர்புடையவர்கள் என்ற சந்தேகத்தின் பேரில் பாகிஸ்தானில் தடுத்து வைக்கப்பட்டுள்ள 130 மலேசியர்கள் விவகாரம் தொடர்பில், அந்நாட்டு அதிகாரிகளுடன் புக்கிட் அமான் பேச்சுவார்த்தை நடத்தவுள்ளது.
உள்துறை அமைச்சர் டத்தோ ஸ்ரீ சைஃபுடின் நசுத்தியோன் இஸ்மாயில் இதனைத் தெரிவித்தார்.
இதற்காக புக்கிட் அமான் வணிகக் குற்றப் புலனாய்வுத் துறை இயக்குநரைப் பாகிஸ்தான் அதிகாரிகளுடன் சந்தித்துப் பேசுமாறு தாம் பணித்துள்ளதாக அவர் கூறினார்.
பாகிஸ்தான் உள்துறை அமைச்சரிடமிருந்து தொலைபேசி அழைப்பு வந்ததைத் தொடர்ந்து இந்த நடவடிக்கை எடுக்கப்பட்டுள்ளது.
பேச்சுவார்த்தையின் முடிவில் கிடைக்கும் அறிக்கையின் அடிப்படையில் அடுத்தகட்ட நடவடிக்கை தீர்மானிக்கப்படும் என்றும் அவர் தெரிவித்தார்.
இதற்கிடையில், பாகிஸ்தானின் ரவல்பிண்டியில் கடந்த வாரம் நடத்தப்பட்ட இணைய மோசடி மையச் சோதனையில் 130 மலேசியர்கள் கைது செய்யப்பட்டுள்ளனர்.
