மலேசியாவில் 5 வயதுக்கு உட்பட்ட 5 லட்சம் குழந்தைகள் வளர்ச்சி குன்றியவர்கள் என்று வகைப்படுத்தப்பட்டுள்ளனர். இது, வளர்ச்சி அடைந்து வரும் ஒரு நாட்டில் இருக்கக்கூடாத பிரச்னையாகும் என்று ஒற்றுமை அரசாங்கத்தின் மேலவை உறுப்பினர் டாக்டர் RA. லிங்கேஸ்வரன் தெரிவித்துள்ளார்.
வளர்ச்சி குன்றிய நிலையில் 4 லட்சத்து 98 ஆயிரத்து 327 குழந்தைகள் இருப்பதாகவும், அவர்களில் பெரும்பாலோர், சமூக, பொருளாதார சூழ்நிலை காரணமாக இத்தகைய சூழ்நிலையில் இருப்பதாகவும் சுகாதார அமைச்சு தமக்கு அளித்துள்ள எழுத்துப்பூர்வமான பதில், தம்மை அதிர்ச்சி அடைய செய்துள்ளதாக டாக்டர் லிங்கேஸ்வரன் குறிப்பிட்டார்.
உண்மையிலேயே மலேசியாவில் இப்படி நடக்கக்கூடாது என்று டாக்டர் லிங்கேஸ்வரன் சுட்டிக்காட்டினார். இந்த ஐந்து லட்சம் குழந்தைகள் என்பது , பாலர் பருவத்தில் உள்ள மொத்த குழந்தைகளின் எண்ணிக்கையில் இது 21 விழுக்காட்டை பிரதிபலிப்பதாக உள்ளது.
சிறந்த சுகாதார மருத்துவ வசதி மற்றும் நல்ல உணவு களஞ்சியம் நிறைந்த மலேசியாவில் வளர்ச்சி குன்றிய குழந்தைகள் அதிகமாக இருப்பதாக அறியப்படுவது கவலை அளிக்கிறது என்று டாக்டர் லிங்கேஸ்வரன் தெரிவித்தார்.
இப்பிரச்னையை அனைத்து தரப்பினரும் கடுமையாக கருத வேண்டும். காரணம், வளர்ச்சி குன்றிய மற்றும் உடல் எடை குறைந்த சிறார்களின் மூளை வளர்ச்சி, நாளடைவில் பாதிப்படையும். இது அவர்களின் எதிர்கால கல்வியை ஊனப்படுத்தி விடும். இதனை தீர்ப்பதற்கு அரசாங்கம் விரைந்து நடவடிக்கை மேற்கொள்ள வேண்டும் என்று டாக்டர் லிங்கேஸ்வரன் வலியுறுத்தினார்.
