பிரதமர் டத்தோ ஶ்ரீ அன்வார் இப்ராஹிம் மற்றும் அவர் தலைமையிலான பக்காத்தான் ஹராப்பான் கூட்டணிக்கு, அரசாங்கத்தின் இரண்டு முக்கிய நிதியுதவித் திட்டங்களான எஸ்டிஆர் எனப்படும் சும்பாங்கான் தூனாய் ரஹ்மா, சாரா எனப்படும் சும்பாங்கான் அசாஸ் ரஹ்மா ஆகியவை பி40 குறைந்த வருமானப் பிரிவு மக்களின் ஆதரவை அதிகரிக்க உதவக்கூடும் என்று அரசியல் ஆய்வாளர்கள் கருத்துத் தெரிவித்துள்ளனர்.
இது குறித்து அகாடமி நுசாந்தாரா ஆய்வாளர் அஸ்மி ஹசான் கூறுகையில், இந்த இரண்டு திட்டங்களும் முன்னாள் பிரதமர் நஜிப் ரஸாக் ஆட்சிக்காலத்தில் அறிமுகப்படுத்தப்பட்ட பிரிம் (BR1M) திட்டத்தைப் போலவே, அன்வார் இப்ராஹிமின் அரசியல் மரபில் முக்கிய இடம்பிடிக்கக்கூடும் என்று தெரிவித்துள்ளார்.
எஸ்டிஆர் திட்டம் பிரிம் திட்டத்தின் நேரடி நிதியுதவி அணுகுமுறையைத் தொடர்ந்து செயல்படுத்தப்படுவதாகவும், சாரா திட்டம் மூலம் பயனாளர்கள் தங்களது மைகாட் அட்டையைப் பயன்படுத்தி அத்தியாவசியப் பொருட்களை வாங்கும் வசதி விரிவுபடுத்தப்பட்டுள்ளதாகவும் அவர் குறிப்பிட்டுள்ளார்.
இந்த நிதியுதவித் தொகை ஒப்பீட்டளவில் குறைவாக இருப்பதாக சிலர் கருதினாலும், தொடர்ச்சியாகக் கிடைக்கும் இந்த நிதி நிவாரணத்தை பி40 பிரிவினர் பெரிதும் வரவேற்பதாக அஸ்மி ஹசான் தெரிவித்துள்ளார்.
எனவே, இத்திட்டங்கள் அன்வார் இப்ராஹிம் மற்றும் பக்காத்தான் ஹராப்பான் கூட்டணிக்கு வாக்குகளைப் பெற்றுத்தரக்கூடும் என்று, நாளை சனிக்கிழமை நடைபெறவுள்ள மலாக்கா தேர்தலை முன்னிட்டு அஸ்மி ஹசான் கருத்துத் தெரிவித்துள்ளார்.
