பாகிஸ்தானின் ராவல்பிண்டி பகுதியில் கடந்த மாதம் தடுத்து வைக்கப்பட்ட 130 மலேசியர்கள் தொடர்பாக மேலதிகத் தகவல்களைத் திரட்ட புக்கிட் அமான் வணிகக் குற்றப் புலனாய்வுத் துறையின் போலீஸ் குழு விரைவில் பாகிஸ்தான் செல்லவுள்ளது.
அங்கு பாகிஸ்தான் அதிகாரிகளைச் சந்தித்து வாக்குமூலங்களைப் பதிவு செய்வதுடன், சைபர் மோசடி மையத்தில் கைப்பற்றப்பட்ட மின்னணு சாதனங்களையும் ஆய்வு செய்யவுள்ளதாக அதன் இயக்குநர் ருஸ்டி இசா தெரிவித்தார்.
மோசடிக் கும்பல் மலேசிய போலீஸ் சீருடைகளைப் பயன்படுத்தி பொதுமக்களை ஏமாற்றிய விதம் உள்ளிட்ட செயல்பாடுகளைக் கண்டறிவதே இந்த விசாரணையின் நோக்கம் என்றும் அவர் குறிப்பிட்டார்.
தடுத்து வைக்கப்பட்டுள்ளவர்களில் 59 பேர் சபாவையும், 57 பேர் சரவாக்கையும் சேர்ந்தவர்கள். ஏனையோர் ஜொகூர், சிலாங்கூர், கோலாலம்பூர் மற்றும் கிளந்தானைச் சேர்ந்தவர்கள் எனத் தெரிவிக்கப்பட்டுள்ளது.
மேலும், 92 பேருக்கு மலேசியாவில் குற்றப் பதிவுகள் இல்லை என்றும், 107 பேர் பாகிஸ்தானில் விசா காலத்தைத் தாண்டித் தங்கியிருந்ததாகவும் போலீஸ் தரப்பு தெரிவித்துள்ளது.
மலேசியர்களைக் குறிவைத்து நிதி மோசடியில் ஈடுபட்டதாகச் சந்தேகிக்கப்படும் இந்தக் கும்பல், வங்கி அதிகாரிகள் மற்றும் போலீசார் போல ஆள்மாறாட்டம் செய்து மோசடியில் ஈடுபட்டதாகக் கூறப்படுகிறது.
