முன்னாள் பிரதமர் டத்தோ ஸ்ரீ நஜிப் ரசாக் வீட்டுக் காவலில் வைக்கப்பட்டுள்ள நிலையில், அவருக்கான பாதுகாப்பு ஏற்பாடுகளுக்கு அரசாங்கம் கூடுதல் செலவு எதையும் ஏற்கவில்லை என உள்துறை அமைச்சர் டத்தோ ஸ்ரீ சைஃபுடின் நசுத்தியோன் இஸ்மாயில் தெரிவித்துள்ளார்.
முன்பு காஜாங் சிறையில் பணியாற்றிய சிறை அதிகாரிகள் தற்போது நஜிப்பின் இல்லத்தில் பணியமர்த்தப்பட்டுள்ளதாகவும், போலீஸ் பாதுகாப்பும் ஏற்கெனவே நடைமுறையில் உள்ள பணியமைப்பின்படியே தொடர்வதாகவும் அவர் விளக்கினார்.
ஒவ்வொரு பணிச் சுழற்சியிலும் மூன்று சிறை அதிகாரிகள் வீதம், நாளொன்றுக்கு மூன்று பணிச் சுழற்சிகளில் பாதுகாப்புப் பணிகள் மேற்கொள்ளப்படுவதாகவும் அவர் குறிப்பிட்டார்.
நாடாளுமன்றத்தில் எழுப்பப்பட்ட கேள்விக்குப் பதிலளித்த அவர், நஜிப்புக்கு மற்ற கைதிகளைக் காட்டிலும் தனிச்சலுகை வழங்கப்படுவதாகக் கூறப்படும் குற்றச்சாட்டையும் விளக்கினார்.
மேலும், குற்றவாளிகள் எவராக இருந்தாலும் மன்னிப்புக் கோருவதற்கு சம உரிமை உண்டு என்றும், மன்னிப்பு வழங்கும் அதிகாரம் கூட்டரசு அரசியலமைப்பின் 42ஆவது பிரிவின்படி மாட்சிமை தங்கிய மாமன்னர் மற்றும் மன்னிப்பு வாரியத்தின் அதிகாரத்திற்கு உட்பட்டது என்றும் தெரிவித்தார்.
மன்னிப்பு மனுவை ஏற்கவோ நிராகரிக்கவோ உள்துறை அமைச்சகத்திற்கு அதிகாரம் இல்லை என்றும் சைஃபுடின் நசுத்தியோன் தெளிவுபடுத்தினார்.
