கெப்போங்கில் வெளிநாட்டவர் ஒருவரின் பாராங் ஆயுதத் தாக்குதலில் வலது கை துண்டிக்கப்பட்ட போலீஸ் அதிகாரிக்கு மேற்கொள்ளப்பட்ட அறுவை சிகிச்சை வெற்றிகரமாக முடிந்துள்ளது.
26 வயதுடைய லான்ஸ் கோப்ரல் தியேரி ரோட்ஜேர் ஃபெண்டியின் துண்டிக்கப்பட்ட வலது கையை கோலாலம்பூர் மருத்துவமனை மருத்துவர்கள் எட்டு மணி நேர அறுவை சிகிச்சைக்குப் பிறகு மீண்டும் பொருத்தியுள்ளனர்.
இந்தச் சிகிச்சையில் ஈடுபட்ட நிபுணர்கள், மருத்துவர்கள் மற்றும் தாதியர்களுக்கு சுகாதார அமைச்சர் டத்தோ ஸ்ரீ டாக்டர் ஸுல்கிஃப்லி அஹ்மாட் பாராட்டு தெரிவித்துள்ளார்.
உள்துறை அமைச்சர் டத்தோ ஶ்ரீ சைஃபுடின் நசுத்தியோன் இஸ்மாயிலும் மருத்துவமனைக்கு நேரில் சென்று போலீஸ்காரர் தியேரி ரோட்ஜேர் ஃபெண்டியின் உடல் நிலையைப் பார்வையிட்டார்.
டேசா அமான்பூரி, கெப்போங்கில் உள்ள அடுக்குமாடி குடியிருப்பில் நேற்று நடந்த இத்தாக்குதலில், போலீஸ் அதிகாரி தலை மற்றும் உடலிலும் காயமடைந்தார்.
தாக்குதலைத் தொடர்ந்து தப்பியோடிய சந்தேக நபர், இரவு 8 மணியளவில் அருகிலுள்ள விளையாட்டு மைதானத்தில் கண்டுபிடிக்கப்பட்டு, சுட்டு வீழ்த்தப்பட்டார்.
