கோலாலம்பூர், ஜாலான் அம்பாங் சாலையில் உள்ள கேஎல்சிசி வணிக வளாகத்தின் எதிரே அமைந்துள்ள பேருந்து நிறுத்தத்தில் மர்மமான பெட்டி ஒன்று கண்டெடுக்கப்பட்டதைத் தொடர்ந்து, 40 வயது ஆடவர் ஒருவரை போலீசார் கைது செய்துள்ளனர்.
நேற்று மாலை 7.17 மணியளவில் இது குறித்து போலீசாருக்குப் புகார் கிடைத்ததாக டாங் வாங்கி மாவட்ட போலீஸ் தலைவர் அஹ்மாட் அஸ்வான் அமின் நோர்டின் தெரிவித்துள்ளார்.
இதனையடுத்து, வெடிகுண்டு செயலிழப்புப் பிரிவு, மோப்ப நாய் பிரிவு மற்றும் தடயவியல் குழுவினர் சம்பவ இடத்திற்கு விரைந்தனர்.
அங்கு சூட்கேஸைச் சோதனையிட்டதில் வெடிகுண்டு அச்சுறுத்தல் ஏதுமில்லை என்பது உறுதி செய்யப்பட்டதாக அவர் கூறினார்.
இச்சம்பவம் தொடர்பாகத் தொடர்ந்து விசாரணை நடைபெற்று வருவதாகத் தெரிவித்த அஹ்மாட் அஸ்வான், உறுதிப்படுத்தப்படாத தகவல்களைப் பரப்புவதையும், சம்பவம் குறித்து ஊகங்களை வெளியிடுவதையும் பொதுமக்கள் தவிர்க்க வேண்டும் எனக் கேட்டுக் கொண்டார்.
இதற்கிடையே, கேஎல்சிசி வணிக வளாகத்தைச் சுற்றிலும் ஏராளமான போலீஸ் அதிகாரிகள் மற்றும் வாகனங்கள் குவிக்கப்பட்டிருந்ததுடன், ஏற்பட்ட போக்குவரத்து நெரிசல் தொடர்பான காணொளிகளும் படங்களும் சமூக ஊடகங்களில் நேற்று இரவு வேகமாகப் பரவின.
