காஜாங், பிப்ரவரி 27 -
உணவு விநியோகிப்பாளரை மோதி தள்ளிவிட்டார் என்பதற்காக காரோட்டி ஒருவரை சாலையிலேயே மடக்கி சரமாரியாக அடித்துக்கொன்றதாக ஐந்து நபர்கள், காஜாங், பண்டார் பாரு பாங்கி மாஜிஸ்திரேட் நீதிமன்றத்தில் இன்று காலையில் குற்றஞ்சாட்டப்பட்டனர்.
41 வயது மொஹாமட் யூரி ரானிஃப் மொஹாமட் பச்சுரி, 34 வயது அசாருல் அசுவான் மொஹாமட் அசான், 33 வயது தெங்கு இசாம் தெங்கு ஹாமிட், 43 வயது மாசிர் னோர்டின் , 40 வயது ஷயாமுல் கோமார் அயோப் என்ற ஐந்து உணவு விநியோகிப்பாளர்களும் மாஜிஸ்திரேட் னுர்டியானா மொஹாமட் னவாவி முன்னிலையில் நிறுத்தப்பட்டு குற்றச்சாட்டு வாசிக்கப்பட்டது.
இந்த ஐந்து உணவு விநியோகிப்பாளர்களும் கடந்த பிப்ரவரி 20 ஆம் தேதி இரவு 9.54 மணியளவில் காஜாங், பெரெனாங்,செமெஞ்சி 2,தாமான் பெலாங்கி,ஜாலான் தி.பி.ஸ் 1/3 இல் புரோட்டோன் சாகா கார் ஓட்டுநரான 41 வயது ஷாஹ்ரில் சமாட் என்பவரை அடித்துக்கொன்றதாக குற்றச்சாட்டில் தெரிவிக்கப்பட்டது.
குற்றவாளி என்று நிருபிக்கப்பட்டால் கட்டாய மரணத் தண்டனை அல்லது கூடிய பட்சம் 40 ஆண்டு சிறை மற்றும் பிரம்படித் தண்டனை விதிக்க வகை செய்யும் குற்றவியல் சட்டம் 302 பிரிவின் கீழ் ஐவரும் கொலை குற்றச்சாட்டை எதிர்நோக்கியுள்ளளர்.
இக்கொலை வழக்கு, ஷா ஆலம் உயர் நீதிமன்றத்திற்கு மாற்றப்படுவதால் குற்றஞ்சாட்டப்பட்ட ஐவரிடமும் எந்தவொரு வாக்குமூலமும் பதிவு செய்யப்படவில்லை.
