பல நிறுவனங்களின் மதிப்பீட்டு வரியை 140 மில்லியன் ரிங்கிட் குறைக்க உதவியதற்காக, 30 மில்லியன் ரிங்கிட் லஞ்சம் கேட்டுப் பெற்றதாகச் சந்தேகிக்கப்படும் அரசு அதிகாரி ஒருவரை மலேசிய ஊழல் தடுப்பு ஆணையமான எஸ்பிஆர்எம் கைது செய்துள்ளது.
ஐம்பது வயதைக் கடந்த அரசுத் துறைப் பிரிவு இயக்குநரான அந்தச் சந்தேக நபர், 2025ஆம் ஆண்டு முதல் இவ்வாண்டு வரை லஞ்சம் பெற்றதாக நம்பப்படுகிறது. சிலாங்கூர் பள்ளத்தாக்குப் பகுதியில் உள்ள ஹோட்டல் ஒன்றில் இன்று அதிகாலை 12.30 மணிக்கு அவர் கைது செய்யப்பட்டார்.
புத்ராஜெயா மாஜிஸ்திரேட் நீதிமன்றம், சந்தேக நபரை ஆறு நாள்கள் தடுப்புக் காவலில் வைத்து விசாரிக்க அனுமதி வழங்கியுள்ளது. கைது நடவடிக்கையை எஸ்பிஆர்எம் தலைமை ஆணையர் டத்தோ ஸ்ரீ அப்துல் ஹாலிம் அமான் உறுதிப்படுத்தினார்.
