கிள்ளான் தெங்கு அம்புவான் ரஹிமா மருத்துவமனையின் அவசர சிகிச்சைப் பிரிவுக்கு முன்னால், நேற்று செவ்வாய்க்கிழமை இரவு கூரையின் ஒரு பகுதி இடிந்து விழுந்தது. எனினும், இந்தச் சம்பவத்தில் நோயாளிகளுக்கோ மருத்துவமனை ஊழியர்களுக்கோ பாதிப்பு ஏற்படவில்லை.
இரவு 7.15 மணியளவில் நிகழ்ந்த இந்தச் சம்பவம், கூரைக்கு மேலிருந்த குழாயில் ஏற்பட்ட கசிவால் கட்டமைப்பு வலுவிழந்ததன் காரணமாக நிகழ்ந்ததாக சிலாங்கூர் மாநில சுகாதாரத் துறை தெரிவித்தது.
தூய்மைப் பணிகள், பழுதுபார்ப்பு மற்றும் தொழில்நுட்ப விசாரணைகள் மேற்கொள்ளப்பட்டன. இன்று புதன்கிழமை அதிகாலை 2.30 மணிக்கு அந்தப் பாதை மீண்டும் திறக்கப்பட்டது.
மருத்துவமனையின் அவசர சிகிச்சைப் பிரிவு வழக்கம்போல் தொடர்ந்து செயல்படுவதாகவும், நோயாளிகள், வருகையாளர்கள் மற்றும் சுகாதாரப் பணியாளர்களின் பாதுகாப்புக்கு முன்னுரிமை அளிக்கப்படுவதாகவும் மாநில சுகாதாரத் துறை தெரிவித்தது.
