மாண்டிரி (Mandiri) அமைப்பின் ஒருங்கிணைப்பாளர் ஹம்டின் நோர்டின் மீதான வெளிநாட்டுப் பயணத் தடையை உடனடியாக ரத்து செய்ய வேண்டும் என 37 அரசு சாரா அமைப்புகளைக் கொண்ட செக்ரடெரியட் ஹிம்புன் கோரிக்கை விடுத்துள்ளது.
பெட்டாலிங் ஜெயா மாவட்ட போலீஸ் தலைமையகத்தின் முன்பாக நடைபெற்ற செய்தியாளர் சந்திப்பில் கூட்டறிக்கை வாசிக்கப்பட்டது.
அதில், முன்கூட்டிய அறிவிப்பின்றி பயணத் தடை விதிக்கப்பட்டதற்கான சட்ட அடிப்படை மற்றும் காரணங்கள் குறித்து அரசாங்கம் அதிகாரப்பூர்வ விளக்கம் அளிக்க வேண்டும் என வலியுறுத்தப்பட்டது.
மேலும், தேச நிந்தனைச் சட்டத்தை முழுமையாக ரத்து செய்யும் நடவடிக்கைகள் நிறைவடையும் வரை அச்சட்டத்தைப் பயன்படுத்துவதற்கு உடனடி தற்காலிகத் தடைவிதிக்க வேண்டும் என்றும், ஹம்டின் மீதான அச்சுறுத்தல் நோக்கிலான விசாரணைகளை நிறுத்த வேண்டும் என்றும் அந்த அமைப்புகள் கோரிக்கை விடுத்துள்ளன.
சமூக ஊடகப் பதிவுகள் தொடர்பாக வாக்குமூலம் அளிக்க அழைக்கப்பட்ட ஹம்டின், நேற்று கேஎல்ஐஏ விமான நிலையத்தில் வெளிநாடு செல்ல முயன்றபோதே தனக்கு பயணத் தடை விதிக்கப்பட்டிருப்பதை அறிந்ததாகத் தெரிவிக்கப்பட்டுள்ளது.








