மலேசிய இந்தியர்களின் தன்மானம் காப்பதற்காக சமூகப் போராட்டவாதி டாக்டர் பி. இராமசாமியின் வழக்கு நிதிக்காக தொடங்கப்பட்ட 15 லட்சம் வெள்ளியை திரட்டும் நடவடிக்கையில் இதுவரையில் 14 லட்சத்து 30 ஆயிரம் வெள்ளி திரட்டப்பட்ட விட்டது. இன்னும் தேவைப்படுவது 90 ஆயிரம் வெள்ளி மட்டுமே என்று நிதி திரட்டும் நடவடிக்கைக்கு பொறுப்பேற்றுள்ள மலேசியத் தமிழர் குரல் இயக்கத் தலைவர் டேவிட் மார்ஷல் அறிவித்துள்ளார்.
இந்திய சமுதாயத்தை ஓர் அணியில் திரளச் செய்திருக்கும் சமுதாயத்தின் இந்த தன்மானப் போராட்டத்திற்கு எதிர்பார்த்ததைவிட இவ்வளவு சீக்கிரத்தில் இலக்கை நெருங்க முடிந்திருப்பது, மிகப்பெரிய பிரமிப்பை ஏற்படுத்துகிறது என்று டேவிட் மார்ஷல் குறிப்பிட்டர்.
சர்ச்சைக்குரிய சமயப் போதகர் சாக்கிர் நாய்க் தொடுத்த அவதூறு வழக்கில் பினாங்கு முன்னாள் துணை முதலமைச்சரான டாக்டர் இராமசாமி, 15 லட்சத்து 20 ஆயிரம் வெள்ளியை இழப்பீடாக வழங்க வேண்டும் என்று கடந்த நவம்பர் 2 ஆம் தேதி கோலாலம்பூர் உயர் நீதிமன்றம் தீர்ப்பு அளித்தது. இந்நிலையில் நேற்று நவம்பர் 8 ஆம் தேதி புதன்கிழமை மாலை 6.30 மணி வரையில் 14 லட்சம் வெள்ளிக்கு மேல் திரட்டப்பட்டு விட்டது. இன்று நவம்பர் 9 ஆம் தேதி வியாழக்கிழமையுடன் தேவையான 15 லட்சத்து 20 ஆயிரம் வெள்ளியை முழுமையாகத் திரட்டப்பட்டு விடும் என்ற நம்பிக்கை வலுப்பெற்று இருப்பதாக டேவிட் மார்ஷல் தெரிவித்தார்.
