கோலாலம்பூர் ஜாலான் துன் ரசாக் பகுதியில் உள்ள The Avenue Club அருகே, இன்று அதிகாலை இரண்டு வாகனங்கள் மோதிய விபத்தில், பெண் ஒருவர் உடம்பில் சுமார் 70 விழுக்காடு தீக்காயங்களுடன் மீட்கப்பட்டார்.
மேலும் இருவர் சிறிய காயங்களுடன் உயிர் தப்பினர்.
இன்று அதிகாலை 5.21 மணியளவில் அவசர அழைப்பு கிடைத்ததையடுத்து, ஜாலான் துன் ரசாக் தீயணைப்பு மற்றும் மீட்பு நிலையத்திலிருந்து, எட்டு வீரர்கள் சம்பவ இடத்திற்கு அனுப்பப்பட்டதாக கோலாலம்பூர் தீயணைப்பு மற்றும் மீட்புத் துறை அறிக்கை வெளியிட்டுள்ளது.
இவ்விபத்தில், பெண் ஒருவர் ஓட்டிச் சென்ற பியூஜியோ கார் மற்றும் இருவர் பயணித்த டொயோட்டா வெல்ஃபையர் வாகனம் ஆகியவை விபத்தில் சிக்கியதாக அந்த அறிக்கையில் கூறப்பட்டுள்ளது.
சம்பவ இடத்தை அடைந்த போது, பியூஜியோ காரானது முற்றிலும் எரிந்து தீக்கிரையாகி இருந்ததாக மீட்புக் குழுவினர் தெரிவித்தனர்.
மேலும், 20 வயதான அப்பெண் ஓட்டுநர் பொதுமக்களால் ஏற்கனவே மீட்கப்பட்டிருந்தார் என்றும் அதிகாரிகள் கூறினர்.
