பினாங்கு மாநிலத்திலுள்ள 28 தமிழ்ப்பள்ளிகளுக்கான வருடாந்திர அடிப்படை நிதி ஒதுக்கீட்டை ரிம2 மில்லியனிலிருந்து ரிம2.5 மில்லியனாக உயர்த்த வேண்டும் என பாகான் டாலாம் சட்டமன்ற உறுப்பினர் குமரன் கிருஷ்ணன் கோரிக்கை வைத்தார்.
பினாங்கு மாநில சட்டமன்றத்தில் 2027ஆம் ஆண்டு வரவு செலவுத் திட்ட விவாதத்தின்போது பேசிய அவர், கூடுதலாக ரிம500,000, அதாவது 25 விழுக்காடு நிதி உயர்வு வழங்கப்பட வேண்டும் என்றார்.
பல தமிழ்ப்பள்ளிகள் பழமையான கட்டடங்களில் இயங்கி வருவதால், கட்டடப் பாதுகாப்பு, மின்சார வயரிங், கூரை, கழிப்பறை மற்றும் அடிப்படை வசதிகளை மேம்படுத்த கூடுதல் நிதி அவசியம் என்றும் வலியுறுத்தினார்.
மேலும், அனைத்து தமிழ்ப்பள்ளிகளிலும் தேவைகள் குறித்த ஆய்வு நடத்தி, பழுதுபார்ப்புப் பணிகளுக்கு முன்னுரிமை வழங்குவதுடன், நிதி ஒதுக்கீடு மற்றும் திட்ட முன்னேற்றம் தொடர்பான வெளிப்படையான அறிக்கையும் வெளியிடப்பட வேண்டும் என்றார்.
இதனிடையே, 2027ஆம் ஆண்டு வரவு செலவுத் திட்டத்தில் டெக் டோம் பினாங்குக்கு ரிம850,000, பினாங்கு ஸ்டெம் அமைப்புக்கு ரிம700,000 ஒதுக்கப்பட்டுள்ளதையும் வரவேற்றார்.
குறிப்பாக, B40 மாணவர்களுக்கு டிஜிட்டல் கல்வி மற்றும் தொழில்நுட்பப் பயிற்சிகளில் சமமான வாய்ப்புகள் வழங்கப்பட வேண்டும் என்றும், பயிற்சிக்குப் பின்னர் வேலை வாய்ப்புகள் உறுதிப்படுத்தப்பட வேண்டும் என்றும் குமரன் கிருஷ்ணன் வலியுறுத்தினார்.
அனைத்து பள்ளிகளுக்கும் பாதுகாப்பான கல்விச் சூழலை உறுதிப்படுத்துவது அவசியம் என்றும் அவர் தெரிவித்தார்.
