எஸ்பிஎம் ஆங்கிலப் பேச்சுத் தேர்வு வினாத்தாள் கசிந்ததா? – தேர்வுத்துறை விளக்கம்

2026-ஆம் ஆண்டுக்கான எஸ்பிஎம் எனப்படும் சிஜில் பெலாஜாரான் மலேசியா ஆங்கிலப் பேச்சுத் தேர்வின் வினாக்கள் கசிந்துள்ளதாக சமூக ஊடகங்களில் பரவி வரும் தகவல்களைத் தேர்வுத்துறை மறுத்துள்ளது.

இது தொடர்பாக இன்று செவ்வாய்க்கிழமை தேர்வுத்துறை வெளியிட்ட முகநூல் பதிவில், பரவி வரும் தகவல்களை ஆய்வு செய்ததில், அவை பாடத்திட்டம் மற்றும் மதிப்பீட்டுத் தர ஆவணமான டிஎஸ்கேபி அடிப்படையில் தயாரிக்கப்பட்ட பொதுவான கருப்பொருள்கள் மற்றும் கணிப்புகளின் பட்டியல் என்று தெரிவித்துள்ளது.

மேலும், தேர்வில் இடம்பெறும் கருப்பொருள்கள் அல்லது முக்கியச் சொற்களுடன் சமூக ஊடகங்களில் பரவும் தகவல்கள் ஒத்துப் போவதால் மட்டும் வினாத்தாள் கசிந்து விட்டதாகக் கருத முடியாது என்றும் விளக்கமளித்துள்ளது.

ஒரே கருப்பொருளை அடிப்படையாகக் கொண்டு பல்வேறு வகையான வினாக்கள், சூழ்நிலைகள் மற்றும் தேர்வுப் பணிகளை உருவாக்க முடியும் என்றும் தேர்வுத்துறை தெளிவுபடுத்தியுள்ளது.