கோலாலம்பூர், நவம்பர்.30-
தொழிலதிபர் ஆல்பெர்ட் தேயுடன் தொடர்புடைய விசாரணையில் வழக்கறிஞர் மஹாஜோத் சிங்கிற்கு வழங்கப்பட்ட நோட்டீஸ் குறித்து Lawyers for Liberty - LFL அமைப்பு முன் வைத்த குற்றச்சாட்டுகளை மலேசிய ஊழல் தடுப்பு ஆணையம் நிராகரித்துள்ளது. இந்த நோட்டீஸ், விசாரணைகளுக்கு உதவ ஆவணங்களைச் சமர்ப்பிக்க அல்லது அழைக்கக் கோரும் அதிகாரம் அளிக்கும் ஆணையத்தின் சட்டம் 2009 பிரிவு 30(1)ன் கீழ் வழங்கப்பட்டது என்று அது தெளிவுபடுத்தியுள்ளது.
Exhibits எனப்படும் விசாரணையின் பொருள் சார்ந்த சான்றுகள் வழக்கறிஞரிடம் இருந்தால், சட்டம் 2009 பிரிவு 30(3)ன் கீழ் அவற்றைக் கட்டாயமாகச் சமர்ப்பிக்க அவருக்குச் சட்டப்பூர்வக் கடமை உள்ளது என்று ஆணையம் வலியுறுத்தியது. எனவே, SPRM இன் இந்தச் சட்டப்படியான நடவடிக்கையை "சட்டத்திற்குப் புறம்பானது" என்று சித்தரிப்பது பொறுப்பற்ற செயல் என்றும், வழக்கறிஞரை அச்சுறுத்தும் எந்த நோக்கமும் இல்லை என்றும் ஆணையம் தெரிவித்துள்ளது.
