செராஸ், பத்து 9 போலீஸ் நிலையத்திற்குள் மோட்டார் சைக்கிளில் வந்த 54 வயது ஆடவர் ஒருவர், கதவைத் திறந்த போலீஸ்காரரை கத்தியால் குத்த முயன்றுள்ளார்.
இரண்டு நாட்களுக்கு முன்பு அதிகாலை 12.10 மணியளவில் நடந்த இந்தச் சம்பவத்தில், போலீஸ்காரரின் வலது வயிற்றுப் பகுதியில் கத்தி பாய்ந்த போது, அவரது பெல்ட்டில் பட்டு தடுக்கப்பட்டதால் அவர் காயமின்றி தப்பினார்.
பின்னர் போலீஸ்காரருக்கும் சந்தேக நபருக்கும் இடையே போராட்டம் ஏற்பட்ட நிலையில், உதவிக்கு வந்த இரு போலீஸ் அதிகாரிகள் அந்நபரை மடக்கிப் பிடித்தனர்.
இந்தப் போராட்டத்தில் ஒரு போலீஸ் அதிகாரியின் இரு உள்ளங்கைகளிலும் வெட்டுக்காயம் ஏற்பட்டதாகத் தெரிவிக்கப்பட்டுள்ளது.
இந்நிலையில், சந்தேக நபரிடமிருந்து சுமார் 20 செ.மீ. நீளமுள்ள கத்தி பறிமுதல் செய்யப்பட்டுள்ளதோடு, இச்சம்பவம் குறித்து மேல் விசாரணை நடைபெற்று வருகின்றது.
மேலும், கைது செய்யப்பட்ட நபருக்கு முந்தைய குற்றப் பதிவு எதுவும் இல்லை என்பதும், போலீஸாரால் தேடப்பட்ட நபராக அவர் இல்லை என்பதும் முதற்கட்ட விசாரணையில் தெரிய வந்துள்ளது.
